Es fv̊r ein búttenere (Mit aufgelösten Abbreviaturen)

Es fv̊r ein búttenere·
vil verre in froͤmdú lant·
der was so minnebere·
swa er die frǒwen vant·
dc er da gerne bant·

Do sprach der wirt mere·
zv̊ zim was er kvnde·
ich bin ein bv́ttennere·
swer mir des gvnde·
sin vas ich im bvnde·


Do trv̊g er sine reife·
vnd sinen tribelslagen·
mit sinem vmbe sweife·
kvnde er sich wol beiagen·
ein gv̊t geschirre tragen·

Sinen tribelwegge·
den nam si in die hant
mit siner slehten egge·
si sprach heilant·
got hat úch har gesant·

Do si do gebvnden·
dem wirte sin vas·
nebent vnd ǒch vnden·
si sprach ir sint niht las·
mir wart nie gebvnden bas·