Es taget vnmaſſē ſchone

Es taget vnmaſſē ſchone·
dú naht mv̊s ab ir throne·
dē ſi ze kriechē hilt mit ganzer vꝛone·
der tag wil in beſitzē nv
der t̀bet ab ir veſtē·
die naht mit ſin̾ gleſten·
deſt war ſi mag niht lang̾ da gereſtē·
wā es iſt zit vn̄ niht zefrů·
dc mā ein ſcheidē w̾be·
ſvs ſang der waht̾ e dc ſich geverbe·
der tag mit ſin̾ roͤte·
wol vf wol vf ich gan iv niht zebelibē bi d̾ noͤte·
ich fúrhte dc d̾ mīe ir teil v̾derbe·

Das hoꝛte in tǒgenr ſchǒwe·
ein ern riche frǒwe·
vn̄ ǒch ir mīnen dieb d̾ durh ein ǒwe·
was ritt̾lichē dar bekomē·
ſi ſp̋h frúnt min̾ wūnē·
d̾ waht̾ wil niht gvnnē·
vns liebes wā er wolte ſin beſpv̄nen·
mit miete dc ich han v̾nomē·
es iſt dē tage vnnahē·
ſi ſtv̊nt vf vn̄ begvnde gahen·
hin zv̊ dē waht̾ eine·
ſi ſpꝛah waht̾ nim ſilb̾ golt vn̄ edel rich geſteine·
la mich den zarten lieben vmbevahen·

Er ſpꝛach ich bin gemietet·
get wid̾ vn̄ nietet·
úch froͤidē wā ich wolte dc ir berietet·
mich daſ habt ir vf ende bꝛaht·
ich warne úch ſwēne es zitet·
dc er mit froͤidē ritet·
ſwēne ich úch ſage ſo huͤtet dc ir iht bitet·
ir lât in dar er habe gedaht·
ſi wart ſa vmbeuāgē·
er kuſte ir rotē mūt ir klarē wāgen·
dc was der mīne lehē·
lib vn̄ luſt die lieſſē ſich do wenig iemā flehē·
da dc ergieng da iſt ǒch me ergangē·