Froͤiden bilde vn̄ ir geberde

Froͤiden bilde vn̄ ir geberde
froͤiden ſchin treit uſſerthalb der welte oꝛ min lib·
da bi ringet mit beſwerde
tǒgen innerthalb das herze duch ein ſelig wib·
von der vngenade ich vinde·
mit wā werndes leides pin·
ſo bin ich der welt geſinde·
der tůn ich min froͤide ſchin·
vnd ie doch mit der geverde·
das das herze duldet leit der froͤiden wider kib·

Svs můs ich mich froͤiden twingen·
dur der welte liebe·
doch iſt ſolchú froͤide ein nicht·
dv́ mit ſo verdachten dingen
vn̄ mit trugeliſten nach der welte gunſt geſchicht|
ſo der lib der welte lachet·
ſo iſt es vmb das herze alſo·
das es in den^{[WS 1]} ſoꝛgē krachet·
ſoͤlcher froͤide bin ich vro·
moͤcht ich troſt vō liebe erringen·
ſo hette ich mit beiden wârer gantzer froͤiden pflicht·

Welt nv lach mich des genieſſen·
das ich diner froͤiden ie leiter vn̄ venre ie was·
vn̄ ſolt mir mit wunſch erſchieſſen·
vn̄ mir woꝛten gegen der lieben der ich nie vergas·
das ſi mir von ſêndem leide·
minen ungetroſten můt·
dvrch ir ſvͤſſen guͤte ſcheide·
welt ob ſi das dvrch dich tůt·
ſo wil ich dir erſt vf ſlieſſen
froͤiden hoꝛt das dv von mir nie wurde erfroͤiet bas·

Anmerkungen (Wikisource)

1. Vorlage: in den.