Froͤit úch beide ivnge vn̄ alt

Froͤit úch beide ivnge vn̄ alt·
winter kalt·
hinnen iſt geſcheidē·
ſchǒwēt an den walt·
velt vn̄ anger ſtet bekleit·
blv̊mē bꝛeit·
ſiht man vf den heiden·
dc iſt mir geſeit·
blv̊mē wiſ·
dvr gruͤniv ris·
bꝛehent vn̄ ſmiêrent
úch zierent·
ir ivngen niht ane vlis·

Da bi hoͤꝛt man vogel ſanc·
ſvnder wanc·
klingen in der ǒwe·
die der winter twanc·
ir gemvͤte ſtet vil ho·
rehte alſo·
w̾e mir ob min frǒwe·
mich noch tete fro·
dú mir ie
ze herzē hie·
nahe lac v̾boꝛgen·
vō ſoꝛgē·
geſchiet ir troſt mich noch nie·

Von ir dvlde ich vngemach·
manig ach·
fuͤget mir dú reine
deſt min froͤide ſwach·
ſeht dc mv̊s v̾duldē ich·
zúhteklich·
wā ſi iſt wandels eine·
dabi mīneklich·
wol geſtalt·
vn̄ niht ze balt·
iſt min troͤſt̾inne·
mine ſīne·
ſi zuket mir mit gewalt·

Der vil ſvͤſſen mv́ndel rot·
mir dē tot·
fuͤget vn̄ ſm̾zē
ǒwe ſend̾ not·
ſol d̾ klagelicher pin·
weſen min·
froͤide minē h̾zē
mv̊ſ vnm̾e ſin·
minē lib·
ſi ſelig wib·
hat vil gar betwūgē·
v̾dꝛungē·
hat froͤide vō mir ir lib·

Min vil ſendeſ h̾ze klaget·
gar v̾zagt·
dc ich der vnm̾e
dú mir wol behagt·
ſol d̾ vngemeine ſtrit·
lēgú zit·
wern vil ſende ſw̾e
mich dē tode git·
wer ich ir
lieb als ſi mir·
leit mir gar v̾ſwūde·
troſt fvnde
min herze nach ſiner gir·