Froͤit úch gegen dem meien schoͤne

Froͤit úch gegen dem meien schoͤne·
froͤit úch gegen des meien zit·
heide in gruͤner varwe lit·
sost gebluͤmet berg vnd tal·
da bi hoͤrt man suͤsse doͤne·
von den kleinen vogellin·
in der blvͤnden bluͤte schin·
doͤnet wol dú nahtegal·
walt vnd ǒwe·
hant von lǒbe ein dach·
rosen in tǒwe·
der ich manigen sach·
stent in wunneklicher blůt·
froͤit úch ivngen hohgemv̊t·

Sich froͤit al dú werlt gemeine·
wan dc ich betruͤbet bin·
minne twinget mir den sin·
vnd ein reine selig wib·
nieman truret wan ich eine·
wie habe ich verdienet dc·
ob ich lange dulde ir has·
dc verderbet mir den lip·
sol ir wiblich guͤte·
mih in sorgen lân·
min hohgemvͤte·
min trostlicher wan·
wirt an froͤiden vngesvnt·
mih entroͤste ir roter munt·

Minne frowe svͤsse minne·
minneklichú helferin·
hilf mir mit der helfe din·
dc min herze fro beste·
dv bekúmberst mir die sinne·
mit der liebe meisterschaft·
vnd mit diner krefte kraft·
dc mir ist nach liebe wê·
dú vil liebe al eine·
mich betwungen hat·
dc ichs beweine·
ob ir trost mih nv lat·
troͤst ein svͤsse minne mich·
sit ich helfe sv̊che an dich·

Wenet des dú wolgetane·
der ich alse kume enbir·
dc ich scheide mich von ir·
dvr dc si mich froͤmdet so·
dc ich stên ir trostes âne·
die minne in min herze twang·
dc ist svnder minen danc·
ah des bin ich gar vnfro·
doh sol niht denken·
das min steter mv̊t·
mv́ge an ir wenken·
ich han dc behůt·
wan ich han si selig wib·
lieber danne min selbes lib·

Sol ich froͤidelos beliben·
von ir dú genade hât·
son wirt niemer sorgen rât·
an mir senden hinnenvůr·
so mv̊s ich die zit vertriben·
iemerlich in sender not·
besser were mir ein tôt·
danne ob mich ir trost vúrkúr·
ich han niht befvnden·
solher smerzen me·
mis herzen wunden·
die tůnt mir so we·
wan mih minne schos alda·
da von sten ich iunger grâ·