Froͤit úch wesent fro

Froͤit úch wesent fro·
gegen der schonen sumerzit·
ir ivngen dast min rât·
mit uch singe ich ho·
ob mir trost min frowe git·
an der min leben stat·
ach si ist so gůt·
swie si mir ioch tůt·
solde ich si aleine sehen·
so wurde ich hoh gemv̊t·

Si vil selig wib·
sol mich noch geniessen lan·
der steten trúwen min·
dc min sender lib·
ir noch ie was vndertan·
vnd mv̊s ǒch iemer sin·
wúnschent dc sich ir·
lieb werde als si mir·
solde ich die vil lieben sehen
dc wer mis herzen gir·

Dú liebe swa si si·
dú mis herzen hat gewalt·
dc mache ich ir wol kvnt·
valsches ist si vri·
tvgende hat si manicvalt·
rôt ist ir der mvnt·
wiblich zuht si hat·
lachen ir wol stat·
vnd ir lihten ǒgen schin·
al dur min herze gat·