Gv̊ten lúte holt (Mit aufgelösten Abbreviaturen)

Gv̊ten lúte holt·
die gabe die got vnser herre selbe git·
der aller dinge hat gewalt·
verdienent sinen solt·
der den seldehaften dort behalten lit·
mit froͤiden iemer manigvalt·
lident eine wile willekliche nôt·
vúr den iemer mere wernden tot·
got hat ú sele vnd lip gegeben·
gebt im des libes hie dc wirt der sele dort ein ewig leben·

Minne la mich vri·
dú solt mich eine wile svnder liebe lan·
dv hast mir gar den sin benomen·
kvmst dv wider bi·
swenne ich die reinen gotes vart volendet han·
so wis mir aber willekomen·
wilt aber dv vs minem herzen scheiden niht·
dc vil lihte vnwendig doh beschiht·
fuͤre ich dich danne mit mir in gottes lant·
so si er der gůten dort vmb halben lon gemant·

Owe sprach ein wib·
was mir doch von liebe leides ist beschert·
was mir dú liebe leides tůt·
froͤideloser lip·
wie wilt dv nv gebaren· swenne er hinnan vert·
dvr den dv were ie wol gemv̊t·
wie sol ich der werlte vnd minr klage geleben·
da bedorfte ich gůtes rates zv̊ gegeben·
koͤnde ich dar vnder beidenthalben mich bewarn·
des wart mir nie so not es nahet er wil hinnan varn·

Wol si vil selig wib·
dú mit ir reinen wibes gvͤte machen kan·
dc man si vuͤret vber se·
ir vil reinen lip·
sol loben swer ie herzelieb gewan·
sit ir hie heime tůt so we·
swenne si gedenket siner not·
lebt min herzelieb oder ist er tot
sprichet si so mvͤsse sin pflegen·
dvr den sin svͤsser lip sich dirre welte hat bewegen·