Hat ieman leit als ich es han

Hat ieman leit als ich es han·
nein ist es als ich mich versinne·
saget an wie ist úwer leit getan·
seht da verderbet mich dv́ minne·
wie mag úch verderben dc nieman gesach·
gedanke vuͤgent wol vngemach·
ist im danne also·
ia ich wurde noh von herzen lieber mere vro·

Wer kan alsolhú merú sagen·
dú ir went han vúr libú mere·
dc stan dú mir nie half getragen·
min leit wan si dc ichz verbere·
wer hat verch betwungen vf die selben not·
dc hat der schonen gvͤte^{[WS 1]} vnd ǒch ir mvnt so rot·
wc kan dc vervan·
leider lihte niemer niht· so habe ich doh den lieben wan·

IR mvgent wol wenen swes ir welt·
ich entroͤstú niht dc es veruâ·
min wan ist noh niht vs gezelt·
dar zv̊ get mir min lieb zenâ·
es vert lihte es ist húre verrer danne vert·
we wie were ich danne ane liebe leides so gewert·
als ǒch manger ê·
nein den was nah liebe niht so herzekliche we·

Ist halbes war dc ir da klaget·
so ist úwer vngemach doch niht kleine·
es ist gar als ich iv han gesaget·
ir sit die ich da von herzen meine·
dar vmbe tv̊n ich niht wan des ich tete doch·
wc ob ir úch vil lihte bc bedenket noch·
warvmbe tet ich dc·
dvr dc ir an der werlte an nihte niemer me getetent bas·

Es dúhte úch lihte bas getan·
danne ich mich gv̊tes dran versinne·
alsolhen zwiuel svlt ir lan·
welt ir behalten gottes minne·
die wil ich behalden gerne wisent wie·
da hant lieb den der úch von herzen minnet ie·
nein des bas verborn·
swer niht minnet der in herzecliche minnet der ist verlorn·

Anmerkungen (Wikisource)

1. Vorlage: gv̊te.