Hete ich niht anders leides me (Mit aufgelösten Abbreviaturen)
[55v]
Hete ich niht anders leides me·
so wolde ich klagen den gruͤnen kle·
den vns der rife vnd ǒch der sne·
verderbet hat
daran geschiht mir leide·
Nv get mir naher ander leit·
dc mir ein wib so gar versert·
[56r] ir minne die mit stetekeit·
gedienet hat·
min lib min herze beide·
dú mir vor allen wiben·
ze frowen mv̊s beliben·
wil dv́ mich v́derben so·
wer sol mich danne machen fro·
ia wers ir sv́nde ob si mir also tete·
Ich wc ir ie getrúwe·
vnd bin ir iemer núwe·
schoͤner danne ein spiegel glas·
herter danne ein adamas·
so ist ir dc herze min an rehter stete·
wol der minne·
dú min sinne·
leret· vnd keret·
nach der besten einer die man in alder welte erkennet·
Wol der gvͤte·
der gemvͤte·
machet· dc mir lachet·
herze vnd al die sinne min swa man si vor mir nennet·
E ich den kvnber·
den ich tvmber·
dvlde· durh ir hulde·
liêsse lieber hette ich rome vnd engellant verbennet·
vnd liege ich dc·
so mvͤsse ir has·
der ich nienen vergas·
min leit vertragen·
so wurde krank·
al min gesanc·
ir werden danc·
mv̊s ich beiagen·
Des wurden tvsent herzen lebende ane swere·
swie min frowe ir versagen wider mich verbere·
Son weis ich noch des kv́niges niht der mir geliche danne were·
Was hilfet si das riche gv̊t·
die niht wibes minne minnent·
vnd des niemer niht beginnent·
dc man nennet hohen mv̊t·
des hofschen zimt den frǒwen niht· swes herze vnsanfte wol getůt·
Manig̾ sv̊chet dur dc iar·
des er doch niht vinden wolde·
sere man si hassen solde·
die den wiben sagent vn war·
swie kleine es mich doch frůme· ich gelǒg in nie so túre als vmb ein har·
Leider si minnent alle niht· als ich·
die da wibes minne flîssent sich·
des sol min frowe lân geniessen mich·
Ja enbin ichs niht der valscher minne gert·
valsches wil ich niemer werden wert·
dc hab ich her behalden drisseg vert·
Dú vil liebe vnde div vil reine·
die ich so herzekliche meine·
erwirbe ich der niht ein vil kleine·
so fúrhte ich dc min sanc erzage·
swie min frowe mir des gvnde·
dc ich von ir minneclichen mvnde·
ir werden grůs beiagen kvnde·
so verdurbe al mins herzen clage·
swie ich ir minne niht beiage·
so wissent das ich allen froͤiden wider sage·