Ich ſach vil liehte varwe han (Heinrich von Rugge)

ICh ſach vil liehte varwe han·
die heide vn̄ alden gruͤnen walt·
die ſint nv beide woꝛden val·
vn̄ mv̊ſſen gar betwungē ſtan·
die blv̊mē vō dem winter kalt·
ǒch hat dú liebe nahtegal·
v̾geſſen dc ſi ſchone ſāc·
ie noh ſtet aller min gedanc·
mit truwē an ein ſchone wib·
ich enweis ob ichs iht genieſſen mvge
ſi iſt mir lieb alſam d̾ lip·

Wurd ich ein alſo ſelic man·
das ich ſi lones dvhte wert·
in der gewalt min froͤide ſtat·
ſo erwurbe ich das ich nie gewan·
vn̄ habe es doch an ſi gegert·
vil wol ane alle valſche miſſetat·
nv geſchiht mir leide in weis dvr was·
ze gv̊te ich ir noch nie v̾gas·
wil ſi mich des genieſſen lan·
ſi iſt vn̄ mv̊s ſin an der ich ſtete wil beſtan·

So ſelig man enwart ich nie
dc ir mī komen tete wol·
vn̄ ǒch dar nach dc ſcheiden we·
ſit ich began dc ſich verlie·
min h̾ze als es belibe ſol·
an ir mit trúwē iemer me·
dú wunnekliche ſúndet ſich·
doch denke ich ſi v̾ſv̊che mich·
ob ich iht ſtete kv́ne ſin·
ſolt ichs bi dē eide ſagē ſo wc es ie der wille min·