Ich bin ein wege mvͤder man (Mit originalen Lettern)

Ich bin ein wege mvͤder man·
nv vert mir einer voꝛ
der rennet ſwēne ich dꝛabe·
als ich d̾ ſtraſſe niht enkan·
ſo volge ich ſinē ſpoꝛ·
nv wirfet er mir abe·
die bꝛvgge da ich vb̾ ſol·
doh het er mir geheiſſē wol·
ir ſtīme iſt beſſer dāne ir mv̊t die mit dē blatte glient·
ein valſcher frúnt d̾ ſchat noh mer dāne offenbar ein vient·

Entw̾fen iſt ein ſpeh̾ liſt·
da hoͤꝛet ſpottē zů·
al nah d̾ ǒgē ſpehē·
ich wene reht d̾ maler iſt·
ob einer miſſe tů·
dc eſ die and̾n ſehē·
vn̄ ſpotenſz niht dvr minē has·
er ſchepfe ſinú bilde bas·
ſw̾ malceſ pfligt die wile es ligt· dvrh terrē vf dē ſlate·
d̾ lobe min bier vns er beſehe wie im ſin wurze gerate·

Sw̾ des biderbē ſwache pfligt·
da bi deſ boͤſen wol·
d̾ hat ſi beide v̾loꝛn·
gewalt den witzē an geſigt
ein ſīnig h̾ze ſol·
mit zúhtē tragē zoꝛn·
des iars kvmt vil lihte ein tag·
dc ers wol v̾endē mag·
vnrehter gehe niemā pfligt er mvg ir wol engeltē·
gv̊ter gebit noch nie gebꝛaſt mit ſchonē zúhtē ſeltē·

Swer mir durh ſine kv́ndekeit·
den minē toͤꝛſchē mv̊t·
wil bereitē an dc lieht·
d̾ kvmt ſin liht in arbeit·
ob ers alſo getůt·
dc ich erkenne niht·
dc doh vil wol geſchehē mag·
kvmt es vs d̾ vinſter an dē tag·
ſo ſv̊che ich vind̾ da loch an v̾legener wete·
gewīnē mvͤz ich niemer frúnt ern ſi die lenge ſtete·