Ich bin gebunden
[249r]
Ich bin gebunden·
zallen stunden·
als ein man·
der enkan·
niht gebaren nach dem willen sin·
dc mag si gebuͤssen· dú mich twinget·
dc min mvnt singet·
manigen sweren tag·
wan ich enmac
niht geruowen ich enkome ir nahe bi·
so dc ich ir sagen muͤsse· was min wille si·
dc eine mac mir sorge wenden·
si kan mit leide âne[WS 1] van vnd mit froͤiden enden·
Ich wil versv̊chen·
ob si gerůchen·
welle dc ich sinne·
nach ir minne·
langer danne ich han getan· enpfahet sis zegv̊te·
so stiget min froͤide gegen der wunneklicher zit·
vnd wirt mir so wol zemv̊te·
dc es wunder were·
ob min herze dc verbere·
dc es von froͤide niht zv̊ den himeln ensprvnge·
vnd von so suͤsser handelvnge·
ein hohes núwes liet in svͤsser wise svnge·
Als ich sihe dc beste wib·
wie kvme ich dc verbir·
dc ich niht vmbevahe ir reinen lib
vnd twingen si zemir·
ich stan dike zesprunge als ich welle dar·
so si mir so sv̊sse vor gestêt·
nême sin ellú werlt war·
so mich der minnende vnsin an get
ich moͤhte sin niht verlan·
der sprung wurde getan·
truwet ich bi ir einer hvlde durh disen vnsin bestan·
Anmerkungen (Wikisource)
- ↑ !