Ich dulde zweier hande has (Mit aufgelösten Abbreviaturen)
[167r]
ICh dulde zweier hande has·
die wil ich mit zúhten liden·
doch tůt mir der eine we·
mit tůt der valschen[WS 1] hassen bas·
danne ob si es solten miden·
ǒch swie es mir darvmbe erge·
swen si minnent der ist svnder ere·
davon froͤit mich ir hassen so sere·
da bi verderbet min gemvͤte·
dc mich dú schoͤne hasset· vnd doch hat so menige svͤze gvͤte·
Ich weis dc bi mir selben wol·
gerte ich tunbes wibes hulde·
ich were eteswes gewert·
dc mich ir minne miden sol·
dc ist ane mine schvlde·
ich habe ir lange doch gegert·
ein gv̊t versagen von wises wibes munde·
dc wene[WS 2] ich mich vil bc gefroͤwen kvnde·
danne ob ein tvmbe mich gewerte·
svs hat dú gv̊te mir versaget des ich ie gerte·
Ob si mich hasset nein si niht·
ǒch han ich mich wol entstanden·
dc si zúrnet wider mich·
ich wene[WS 3] si hoͤret vnd siht·
was ich wirbe in al den landen·
des verstet si rêhte sich·
ia herre wa von weis si dú mere·
das ich sv̊chte ein wib dú besser were·
die sv̊chte ich dast ane lǒgen·
do hies mich wider keren· herze mv̊t vnd ǒch dú ǒgen·
Er dunket mich ein kvͤner man·
der so einem wisen wibe·
vmb ir minne dienen wil·
ob er sich niht enthalden kan·
beide an mv̊te vnd ǒch an libe·
sost sin kvmber gar ein spil·
sint die andern wise alsam dú mine·
von der ich in manigen sorgen schine·
so weis ich wol dc toren sinne·
vil selten kan erwerben rehte wises wibes minne·
Ich wolde dike minen mv̊t·
gesenften dc ich von ir were·
dc ich ir vergesse gar·
sone wc mir dc zenihte gůt·
wan dc ich vil grôzer swere·
han so ich verre von ir var·
ia herre wie moͤhte ich ir vergessen·
ich wil si gelich der svnnen messen·
die siht man allenthalb geliche·
also tv̊n ich swar ich kere die tvgenthaften seldenriche·