Ich froͤwe mich gen dem Meijen nichtes nicht

Ich froͤwe mich gen dem Meijen nichtes nicht·
in getrurt ǒch nie gen des winters zit·
sol aber mich erfroͤwen ichtes icht·
das sol tůn ein wib an der min froͤide lit·
sol ich truren das kumt von ir schulden·
sênfter wolt ich dulden·
den tot ê· ich enber ir hulden·

Si sprichet vil si si min frúnt gar gůt^{[WS 1]}·
vnd wil doch nicht tůn das min herze gert·
wa bi sol frúnt erkennen frúndes můt·
frúnt sol sin gen frúnde das er werde gewert·
vrǒwe bist dú min frúnt das la schin·
werden liebe min·
sprich ia so lebe ich sunder pin·

Wan seit das in himilriche si froͤiden vil·
swes den man lúste dv́ froͤide si im na·
durch iren willen ich dar komen wil·
wirt si mir nicht hie secht so wirt si mir da·
moͤcht aber mir ir hulde werden·
ich belibe vf der erden·
al hie got lies ich dort die werden·

Anmerkungen (Wikisource)

1. Vorlage: gůte.