Ich sach vil liehte varwe han

Ich sach vil liehte varwe han·
die heide vnd al den gruͤnen walt·
die sint nv beide worden val·
vnd mv̊ssen gar betwungen stan·
die blv̊men von dem winter kalt·
ǒch hat dú liebe nahtegal·
vergessen dc si schone sanc·
ie noch stet aller min gedanc·
mit trúwen an ein schoͤnen wib·
ine weis ob ichs icht genîessen mvge si ist mir lieb alsam der lib·

Wurde ich ein also selig man·
dc ich si lônes dvhte wert·
in der gewalt min froͤide stat·
so erwurbe ich dc ich nie gewan·
vnd habe es doch an si gegert·
vil wol ane alle valsche missetat·
nv geschiht mir leide ich enweis dur was·
ze gv̊te ich ir noch nie vergas·
wil si mich des geniessen lan·
si ist vnd mv̊s sin an der ich stête wil bestan·

So selig man enwart ich nie·
dc ir min kômen tete wol·
vnd ǒch darnach dc scheiden we·
sit ich began dc sich verlie·
min herze als es beliben sol·
an ir mit trúwen iemerme·
dv́ wunnekliche sv́ndet sich·
doch denke ich si versůche mich·
ob ich iht stete kvnne sin·
solt ichs bi dem eide sagen· so wc es ie der wille min·

Minne minnet steten man·
ob er vf minne minnen wil·
so sol im minnen lon geschehen·
ich minne minne als ichs began·
die minne ich gerne minne vil·
der minne minne ich han veriehen·
die minne erzoͤige ich mit der minne·
dc ich vf minne minne minne·
die minne meine ich an ein wib·
ich minne wan ich minnen sol dvr minne ir minneklichen lib·