Ich sachs an der min froͤide lit

Ich sachs an der min froͤide lit·
bi andern schonen frǒwen gan·
si duhte mich an allen strit·
dú beste vnd da bi wolgetan·
da was von frǒwen ein michel schar·
ich nam niht wan einer war·
min ǒgen blihten dike dar·

Minne svͤssiv fuͤgerinne·
dv fuͤge das min werde rât·
dv twinge ir herze vnd alle ir sinne·
rehte als si mich betwungen hat·
tv̊ mir vf der selden túr·
flús zv̊ vnd la mich niht da fúr·
so seze ich vf der selden kivr·

Mich hat ein liehter ǒgen blik·
geschossen in das herze min·
da leite si mir der minne strik·
des mv̊s ich ir gevangen sin·
wer heilet hie ia bin ich wunt·
dc tv̊t ir rosevarwer mvnt·
solde ich den kv́ssen tvsentstunt·

Genigen si der gv̊ten dar·
der ich vil eigenliche bin·
swar ich in dien landen var·
so hat si dort herze vnd sin·
von mir gescheiden ane strit·
min trost min heil gar an ir lit·
ir lib froͤit fúr des meien zit·

Kvnde ich nv mit fůge erwerben·
dc ich ir gelege bi·
geschiht des niht ich mv̊s verderben·
seht wie gerne ich bi ir si·
dvr si so lide ich grosse not·
in vermeit noch nie swas si gebot·
si troͤste mich alder ich bin tot·