Ich sing vnd solte weinen

Ich^{[WS 1]} sing vnd solte weinen·
den tugenthaften ritters lip·
das nicht mins sanges meinen·
dich kan gemanen werdes wip·
Noch hoͤre wisen rat
der tag uf gat·
vnd lat div nacht ir vinster varw als ie
vil schone wip bewar·
das er wol gevar·
der gar an mine hǒte sich verlie·

Des^{[WS 2]} wachters clage singen·
mit iamer min hertze brach·
da von ein misselingen
an lieben froͤnden ir geschach·
ir leides husgenoz·
der trehene floz·
begoz· ir beider wengel do vil gar·
si sprach frúnt herre min·
wie sol ich din·
nu sin· verweiset allerselden bar·

Der^{[WS 3]} wachter sang aber lúte·
mit zorn vnd doch in frúndes clage·
swa lieb betagt bi trute·
da kumet der merkere sage·
ein hertze in froͤden ho·
sol minnen so·
das fro· dar nach div liebe vnd lang beste·
wirt si der hůt erkant·
so wirt zehant·
gesant· ir wunne· ir lange wernde we·

Sins^{[WS 4]} liebens kúneginne·
der ritter an sich naher twang·
da schůf div werde minne·
von beiden suͤsen vmbevang
ein lieber naher smuk·
ir múndel druk·
ein fluk· ir hertzen an ein ander da·
tæt kunt ir minne gir·
si im er ir·
an dir· min leben lit· nút ander fwa·

Von^{[WS 5]} den gelieben beiden·
wart da mit willen vmbegert·
ein iamerliches scheiden·
dem ritter vnd der frǒwen wert·
ir wunneklich gemach·
dc scheiden brach·
vnd iach· in wandelunge^{[WS 6]}· lieb in leit·
ir hertzen wehsel wart·
da nit gespart·
dir wart· also geschach· der tag zů schreit·

Anmerkungen (Wikisource)

1. Vorlage: ch.
2. Vorlage: es.
3. Vorlage: er.
4. Vorlage: ins.
5. Vorlage: on.
6. Vorlage: wadelunge.