Ich solt ein lúzel miner langen swere klagen
[170r]
ICh solt ein lúzel miner langen swere klagen·
allen wol gemv̊ten lúten vmb ein wib·
der kvnde ich solhes nie gesingen noh gesagen·
sin verderbe an allen froͤiden mir den lib·
swie gerne ich froͤlich svnge als man ǒch wilent sang·
des wil si minnekliche mir niht wissen dank·
dar zv̊ sint die lúte vn vro·
die vns froͤide solten meren der mv̊t stet nv leider niht also·
Swie gar ich ane herzekliche froͤide si·
doh so vreuwe ich dirre svmerwunne mich·
vnd einer hande sorge bin ich doch niht vri·
dc die lugenere an mir vertoͤrent sich·
ir vogel singent úwern sang· so singe ich mitte·
in einem svͤzen done dc wc ie min sitte·
blv̊men vnd gruͤner kle·
tůnt iv wol da bi tůt mir der valschen lúte froͤide vnmazen we·
Ich han eins reinen svͤzen wibes werdekeit·
al da her gesvngen mine besten tage·
vnd hab ir lob gemachet in der werlte breit·
da bi wendet si zeseine mine klage·
ie doh enlaze ich miner besten trúwe niht·
in singe ir vnd spreche ir wol· swc mir geschiht·
sit si so manige tvgende hat·
owe dc min langer dienest also lúzel in ir ore gat·