Ich tete gerne ſchin
[56r]
Ich tete gerne ſchin·
grôſſē pin·
dē ich nv lange han·
wolde gelúke ſin·
der venre min·
ſo mvͤſe ich ſoꝛge lan·
ſwie mir dar an gelinge·
doch ratet dc ich ſinge·
eī wūneclicher mv̊t·
ǒch dvnket es mich gůt·
ſwer ere g̾ne iaget·
der gevat ir deſte me·
des bin ich vnverzaget·
ſwies mir dar vmbe erge·
Jch bin ein ſelig man·
dc ich ie gewan·
Als ſchonē ſin·
der mich geleren kan·
lâſſen vn̄ han·
Als ich ſpil vnder in·
vn̄ ich wol kan geſcheiden·
die lieben vō den leiden·
das mein ich an ein wib·
vn̄ ir vil gv̊ten lip·
dú mir die froͤide machet·
der ich ê nien gepflag·
da vō min h̾ze lachet·
vil dike als es wol mag·
hohen mv̊t ich nien gewan·
ê ich die ſchonen ane geſach·
dú mir tv̊t dc ich wol kan·
v̾duldē leit vn̄ vngemach·
min h̾ze nie vō wibe me·
ſo rehte wol ze mir geſpꝛach·
dc wolde ich wider reden ê·
do betwanc es mich dc ich ime v̾iach·
kvnde ich wol ſo ſolt ich ſagen·
vō ir dc beſte als ichs entſtan·
dv́ mir ſol vil gar v̾tragen·
dc ich han den mv̊t an ſi v̾lan·
ſi hat berǒbet ellú wib·
an mir vn̄ mv̊s mich eine han·
Ja wage ich ere vn̄ ǒch dē lib·
waſ mohte ich nv dvr ſi began·
Si kan nach eren·
wol v̾ſchuldē·
lobes vil
den mā ir tůt·
vn̄ ǒch bekeren·
nach ir huldē·
ſwen ſi will
ſi iſt ſo gv̊t·
Wie moͤhte ich eine
ſi v̾laſſē·
ane ſtrit·
ſo dienet ir·
dc lant gemeine·
vn̄ vnv̾waſſen·
zaller zit·
iſt ſi vō mir·
war tete ich dāne minē ſin·
der mich dc beſte leret·
io erwurbe ich lihte den gewī[WS 1]·
der manig h̾ze ſeret·
Si hat dv́ minne
zeineme gaſte·
nv vil manigē tag gezalt·
dc ſi ir ſinne
niht ſo vaſte·
ziehē wil in ir gewalt·
als ſi die mine hat getan·
ǒch iſt mir dc ein ere·
der ich wolde weſē ane·
húte vn̄ iemer mere·
Min herze iſt grôſ vn̄ wart nie ſwach·
dc es getoꝛſte ernenden·
Alſolhe ſwere· vn̄ vngemach·
dv́ mih tůt ellenden·
Jſt min frowe ein teil ze her·
dvr wen ſolde ich dc wendē·
ſo wirt min froͤide deſte mer·
wil ſi min not volenden·
der zwiuel tv̊t mir leideſ[WS 2] vil·
doch [56v] troͤſtet mich gedinge·
ob ich bin ſtete· als ich da wil·
dc mir vil wol gelinge·
Jch ſage iv wer den ſtrit geriet·
dc tatē mine ſinne·
Jne mv̊t ir anders niet·
wā dc ich ſi minne·
ſo hat ſi mich gar gewert·
des ich an ſi ſinne·
er iſt vil wis ſwer mâſſe gert·
des bin ich woꝛden inne·
ich han mich ſelben vb̾laden·
mit wūderlicher ſtete·
buͤſet nieman mir den ſchaden·
dc ziet ſich ze vngerête·
wer ſolde ſtere
an wibē geltē·
wan ein vngefuͤger man·
der miſſetete·
vn̄ ſeltē·
gv̊tes iht v̾ſchulden kan·
ſo ſchone ſinne·
die gerietē·
das ſi kan des beſten warn·
den ſol dú mīne·
dc v̾bietē·
das verbietē dc an mir niht miſſevarn·
Sol mih v́gan·
ir grôſſe gvͤte·
die min ǒge an ir erſach·
ſo mv̊s ich lan·
ein hohgemvͤte·
dc iſt mir ein vngemach·
des ich niht v̾geſſen wil·
vn̄ lebt ich tvſent iare·
ſo het ich iemer leideſ vil·
dc ſage ich iv zeware·
So gros iſt min klage·
dc ich gar v̾zage·
ſin enwelle ir wider ſage·
lâſſen dú mir alle tage·
vil zenahe gat·
ſi ſol den rat·
kieſen der zen eren rehte ſtat·
ſit ſi ſich noch ſo wol behv̊tet hat·
voꝛ miſſetat·
Swie ſere mich twīge·
ſi vō der ich ſinge·
doch han ich gv̊t gedinge·
dc mir noch wol gelinge·
wande ich wil den ſtrit·
han alle zit·
vnz dc ſi der not ein ende git·
dú doch vil nahe zallē zitē lit·
mir iemer ſit·
Sit ſi min gemvͤte·
gevie mit ir gvͤte·
nach der ich mich verwuͤte·
ſwie ſere man ir huͤte·
Doch bin ich der man·
der ir wol kan·
verholne dienē ob ſi mir des gan·
was kan gewerrē mime libe dan·
der mirſ v̾bā·
Dú mīne·
mine ſinne·
betwūgen ſo hat·
dc min h̾ze ſtât·
mit ſoꝛgē ſwies ergat·
Wie ſol des w̾den rat·
es iſt ein miſſetat·
dc ſi mich eine lat·
Mir w̾e·
vil ſwere·
min mv̊t vn̄ krank·
wā dc ſi betwang·
min herze des iſt lang·
dc ich nach froͤiden rank·
vn̄ ǒch vil dike ſanc·
des ſage ich ir danc·
Nvn ger ich niht mere·
wā dc dú ſchone mich ze rehte lere·
in der welte ſol ichs iht began·
da vō ich mvſe haben wan·
dc ſi min genade welle han·
Swc ich nv vō hohem mv̊te·
ie geſpꝛach vn̄ ouch tet ze gv̊te·
daran bꝛahte mich min frowe gv̊t·
davō min h̾ze vnde al der mv̊t·
gerne zallē zitē dc beſte tůt·
Sw̾ gerne nach eren wil ringē·
der ſol ſinen mv̊t betwingē·
dc er ſeltē an ihte miſſetv̊·
Ja mag im wol dar an gelingē·
kan ers mit ſchoner fůge bꝛingē·
ſo wol beide abent vn̄ frů·
dc im die beſtē ſpꝛechent wol·
dc hilfet im darzv̊·
Er ſol ſin milte vn̄ niht ze here·
dc iſt min tvmbeſ mānes lere·
wil er in der welte den pꝛiſ beiagen·
ſvnder valſch er ſine ſinne kere·
daran dc er mit zúhtē mere·
ſin froͤide tǒgenliche ſol er tragē·
ein lieb da vō ſin herze vꝛo·
belibet zallē tagen·
Ja enmag ze ſtete
nieman tragen ho·
dē mv̊t ſwie gerne ers tete·
noch rehte weſē vꝛo·
wā der ze hohe mīne hat·
gv̊ten wan deſ herze ſtat·
voꝛ valſcher fůre wol behv̊t·
dú mīne twīget· ſinen mv̊t·
dc er zallē tvgentlichē dingē mv̊s ſin berelt·
deſ wirt ſin lob vō rehten ſchulden wit vn̄ bꝛeit·
Ein man ſol niht v̾midē·
durh boͤſer lúte niden·
er ſi dien frowē zallē zitē vndertan·
vn̄ mv̊s er da vō kvmb̾ han·
dē ſol er gerne lidē·
Mag er ſi bꝛingē innē·
v̾wentlicher mīnen·
vn̄ dc ſin lib iſt aller valſch̾ ſitte blos·
ſo mv̊s ſin froͤide w̾den grôs·
ſwel leit er des gewinne·
Er lâſſe ime ſin der boͤſen nit· zelihter wis·
wc ſol ein beſſer paradýs·
ob er mag vꝛo beliben·
vō wol geloptē wibē·
Ja klage ich min ſw̾e·
dc mir noch nie gelanc·
ſwie g̾ne ich da were·
da man nach froͤidē ranc·
Min h̾ze ie gerne dc beſte riet·
dē libe ſwies in doch niet·
v̾uahen kvnde vmbe ein har·
dv́ woꝛt dv́ dvnkent mich niht war·
dc man ſpꝛichet dar nach man w̾be· des w̾de meiſt dem man·
vn̄ ich ſo h̾zeclich ze manigē ſtvndē gewoꝛben han·
vmb einer frowen hvlde·
vō der ich dike dulde·
Alſolich not dv́ mime libe nahe gât·
dc mich ſo kleine dc v̾uat·
daſt ane mine ſchulde·
Jch diene vf gv̊t gedinge·
ſwie mir daran [57r] gelinge·
min herze iſt ir mit trúwē zallen ziten bi·
voꝛ leide wirt es niemer vꝛi·
es ſi dc ſi mich twinge·
mit ir wolſtēden ǒgen·
dc ſi mich ſehe tǒgē·
an mīneclich alſo· dc ich wol mvge entſtan·
dc ſi min genade welle han·
ſo wirde ich ane lǒgen·
fro vn̄ zallen zitē ſchon vn̄ wol gemv̊t·
des hat ſi leider ſich behv̊t·
dc ſi giht mit ir gvͤte
troͤſte min vngemvͤte·
Jch wil der ſchonē kv́nden·
dc mir iſt rehte als ê was gvrâſſe·
der in des ſewes úndē·
ertranc da vō das er ane mâſſe·
mīnet eine frǒwen dc ſi mich des erlâſſe·
Des bitte ich inneklichē·
die gv̊ten dv́ mich hat ſo gebvndē·
dc in allen richen·
niemē lebt der ſo gar v̾wundē·
ſi vō ſtarkē rúwen als ich bin zallen ſtvndē·
So ſere nie bevangē·
enwart noch riter gawan vō mīnen·
ich ſi in ir getwangen·
noch vaſter wolde ſi ſich des v̾ſinnē·
ſo moͤhte ichs noch vō ir vil ſvͤſſen lon gewīnen·
Es enſi dc ſi mich welle·
begnadē ſo iſt mir zallen ziten·
als eime der in der helle·
mv̊s mit rúwen gotes helfe bitē·
ich ſtirbe ob ich zelang̾ vꝛiſt mit ſolher not ſol ſtriten·
Ob ich vō ir eine·
v̾dirbe dc iſt kleine·
wie lútzel mich des wūdert·
ia lāgent tuſent hvndert·
ze troie vō elenen tot·
noch gerner mac man lidē dvr mine frowē not·
wā got ein beſſer wib nie werden gebot·
Schoͤner lebt enkeine·
wan die ich dā meine·
ī allen landē·
die ſi îe erkanden·
oder hant geſehē·
die mvͤſſen ir alle vō waren ſchuldē iehē·
dc dem der ſi minnē ſol niemer kan bas beſchehē·
Si ſagēt vō gútinnē·
die hie voꝛ minnē·
pflagen zalten ziten·
in dien landen witen·
dc ſi w̾en ſchoͤne vn̄ gv̊t·
hete die got wol geſvnt vntz her behv̊t·
ſi en moͤhten gar gelichen niht der dú mich ſīgen tv̊t·
Es wart nie niht ſo gv̊tes·
noh ſo hohes mv̊tes·
ſi kan mit ſchonē ſinnē·
ſolich lop gewinnē·
dc ir die beſten ſpꝛechent wol·
vō ſchuldē ir zeguͤte al dv́ w̾lt gedenkē ſol·
ſwa ſi wont da mv̊s dc lant vō ir ſin froͤidē vol·
dc ie ſo ho dc h̾ze min·
gerîet an ein wib ſo gv̊t·
des mv̊s ich fro vō ſchulden ſin·
ſi hat voꝛ valſche gar behv̊t·
ir vſerwelten gv̊ten lip·
in ſchoner froͤide ſtet ir mv̊t·
gehoͤhet ſo fúr ellú wib·
das mime libe ſanfte tůt·
Min gemv̊te·
tv̊t der merkere ſpehe
leides vil·
Jn getar voꝛ hůte·
niemer ſi reht an geſehen·
als ich will
deſ ſol ir gvͤte·
niemer mich engelten lan·
wā ſwa der lib·
iſt min gemvͤte·
wirt ir ſeltē an·
enchein ander wib·
enmag getroͤſten mir den mv̊t·
es enſi dc ſi mir ſende
ein botē der mit woꝛtē gv̊t·
mir kv́nde ein liebes ende·
Elîes leit vil manigē tac·
voll liebe grôſſe ſw̾e·
Klienoꝛ des ſelben pflac·
wie vngerne ich v̾bere·
ich endiende ir baſ· ald alſe wol·
der lib iſt mir vnmere·
ob ich ſi dike midē ſol·
bi der ich gerne were·
Ane kvmb̾ moͤht es ſin·
nv ſcheident vnſ die boͤſen·
die hvͤtent ir ſo tv̊nt ſi min·
got mvͤſſe vns vō in loͤſen·
Mir wc dú mīne ein teil ze gram·
dv́ mich vil ſere twinget·
do ſi mir die mâſſe nam·
da mit vil maniger bꝛinget·
ſin gemvͤte an solhen wan·
da im vil wol gelinget·
ſi moͤhte michs han erlan·
min h̾ze vnſanfte rīget·
nv han ich helfe noch den rat·
an dē ich mich v̾laſſe·
wā der gv̊ten dú mich hat·
betwūgē ane mâſſe·
hei wie ſi ſich eret·
ob ſi min leit v̾keret·
vn̄ mir die froͤide meret·
dú uil manig h̾ze leret·
lebē ane twanc·
vf ſvͤſſen ſanc·
der machet mengē man ſin trurē kranc·
ǒch tv̊n ich ir den ane valſchen wanc·
vf gůten danc·
Nv ſeht wie ichs wâge·
ich ſeze ir zelâge
beide frúndē vn̄ mâge·
kvmt mir danne iht ze trage·
ir lon des wirte ich alt·
mir wart gezalt·
vō der ſchonē ere manigvalt·
der han ich fvndē vil in ir gewalt·
deſ bin ich balt·
Nv enweis ich niht zware·
wie min frowe wil dc ich mich gebâre·
vō der ich die grôſſen not enpfie·
ſin enwart mich noch ze rate nie·
nv tete ich g̾ne dc beſte wiſſe ich wie·
Swc mir geſchiht ze leide·
darvmbe ich niemer doch geſcheide·
vō d̾ liebē minē ſtetē mv̊t·
dē ſw̾en tag er wol v̾tůt·
d̾ ſich v̾ſiht dc d̾ abēt w̾de gv̊t·