Ich wil die vil gv̊ten vlehen

Ich wil die vil gv̊ten vlehen·
vmb ein ding dc ich doch han·
in gewalt vnd in gewer·
dc si lihe mir ze lehen·
were dc willeklich getan·
so enmoͤhte ein ganzes her·
mir an froͤiden niht gezern·
alles truren wer mir wilde·
fluge ich niht dc wer vnbilde·
wer solt ir die minneklichen milte irwern·

Sine mag mirs niht verzihen·
wirt min rede von ir vernomen·
wan es ist ir ane schaden·
wil si mirs ze zinse lihen·
so sol ir min herze komen·
mit liebe vúr zins geladen·
sprich vrowe es ist der wille min·
kanstu mich mir worten gesten·
vúr die schoͤnsten vnd die besten·
lob ich dich dc ist min reht dú ere ist din·

Doch ensoltv mirs niht senden·
ich wil selbe zv̊ dir dar·
da wirt es vns beiden sleht·
ratet wie sol ichs volenden·
dc ich in ir hvlden var·
wil si ich tv̊n ir mannes reht·
mine hende valde ich ir·
růchet sis so sol ich gahen·
vnd sol es mit kvsse enpfahen·
mit ir geren sols sis selbe lihen mir·

Si enwil an mir niht erwinden·
si nimt mir in minen tagen·
dike miner vroͤiden spil·
mag ich niht genade vinden·
so wil ichs ir gvͤte klagen·
dú hat hoher trúwe vil·
der vrteil ich gerne kvr·
si nimt mir herze vnd sinne·
der mirs riete ich nême ir minne·
e ich ane wer lib vnd gv̊t verlur·

Swer nv wolte tegedingen·
dem wolt ich des sagen dank·
vur reht ich genaden ger·
wer moͤht vberein vns bringen·
frowe minne es tv̊ din swank·
nv solt dv des sin min wer·
dc ich dir bin vndertan·
maht dv disen strit gestellen·
vnd zein ander vns gesellen·
alles liebes wil ich ir niemer abe gan.

Ein blic ein wanc·
froͤide vnd leit
hant mir gegeben·
ir ǒgen swanc·
gab froͤiden kleit·
dc zart enneben·
zwei ir blikes wenken·
sweders si wil·
sorge oder spil·
dc kan si ir vrv́nde^{[WS 1]} schenken·

Nie valsche gv̊t·
ze dem lůder kam·
so snellekliche·
als min mv̊t·
si vlúget an·
genendekliche·
er zir herzen bosset·
vil mangen stoz·
es ist wunder gros·
dc er si niht vber stozet·

So geil wc ie·
mins herzen sin·
das mangen man·
des wundert wie·
si in vuͤre hin·
sit er niht zan·
ist dc er niht zuket·
dem ie so wilt·
sin fluch gezilt·
wc dc der zú ir flucket·

Anmerkungen (Wikisource)

1. Vorlage: vmvnde.