Ich wil gruͤnen mit der sat
[310v]
Ich wil gruͤnen mit der sat·
dú so wunneklichen stat·
ich wil mit dien blv̊men blvͤn
vnd mit den vogelin singen·
ich wil lǒben so der walt·
sam dú heide si gestalt·
ich wil mih niht lassen mven·
mit allen blv̊men springen·
ich wil zeliebe miner lieben frowen·
mit des vil suͤssen meien tǒwe tǒwen·
Dest mir alles niht zevil·
ob si mich troͤsten wil·
Si ist so gar nach wunsche ein wib·
swenne ich schǒwe ir werden lib·
des grales herre wenne ich sin·
ich bin so froͤiden rich·
dc man in der froͤide wol·
da mit vbergulden sol·
si hat wunnebernden schin·
der svnnen wol gelich·
ich wil zegůte aller gůten wibe·
gedenken wol zeliebe ir reinem libe·
Dest mir alles niht zevil·
ob si mich troͤsten wil·[WS 1]
TRoͤste suͤsse troͤsterin·
troͤste wol wan ich bin din·
slús vf dinen roten mvnt·
dú heis mich vro beliben·
so mag ich froͤlichen varn·
in den lúften ob den arn·
lieb tů mir din helfe kvnt·
min trost ob allen wiben·
ich wil in trúwen dir getrúwen húre·
das mich din guͤte wol zfroͤiden stúre·
Dest mir alles niht zevil·
ob si mich troͤsten wil·[WS 2]