Ich wil wol von wibes gvͤte

Ich wil wol von wibes gvͤte·
iemer sprechen vnd singen·
dur si dú mir hohgemvͤte·
mag vor allen frowen bringen·
si ist eine
die ich meine·
vor in allen·
wol gevallen·
mv̊s si mir·
seht darvmbe diene ich ir·

Ich ergab mich eigenliche·
ir do ich si sen begunde·
dc hat si dú seldenriche·
gar vnmere sit der stvnde·
dc si gv̊te
minem mv̊te·
swere merte·
do verserte·
si mich gar·
des nimt si nv kleine var·

Wisse ich wie ich mich gebarte·
da von si min ahte neme·
vnd ich niender des envarte·
dc ir eren missezeme·
der gedinge·
machet ringe·
mich von sorgen·
froͤiden borgen·
wolde ich dan·
des si leider mir erban·

Minne tůt vnminnekliche·
mir an ir die ich da minne·
si betwinget vngeliche·
min vnd der vil gv̊ten sinne·
dast ein swere·
dú mih lere·
froͤiden machet·
vnd swachet·
mir den lib·
dc bedenke ein selig wib·