Ich wolte dc der anger sprechen solte

Ich wolte dc der anger sprechen solte·
als der sýtich in dem glas·
vnd er mir dāne rehte sagen wolte·
wie gar sanfte im húren was·
do min frowe blv̊men las·
ab im vnd ir minnenclichen fuͤsse
růrten vf sin gruͤnes gras·

Her anger was ir úch froͤiden mvͤstent nieten·
do min frowe kom gegan·
vnd ir wîssen hende begonde bieten·
nach úwern blv̊men wolgetan·
erlǒbet mir her gruͤner plan·
dc ich mine suͤsse· setzen mvͤsse
da min frowe hat gegan·

Her anger bittent dc mir swere svle bvͤssen·
ein wib nach der min herze ste·
so wunsche ich dc si mit blôssen fuͤssen
noch húre mvͤsse vf úch ge·
so geschadet iv niemer sne·
wirt mir von ir ein lieblich gruͤssen·
so grůnet min herze als úwer kle·