Klingeſoꝛ vō Vngerlant (Hie kriegēt mit ſange)
[219v]
Hie kriegēt mit ſange· Hˢ walth̾ vō d̾ vogilweide· Hˢ wolfran von Eſchilbach· Hˢ Reiman der Alte· der tugendhafte ſchꝛiber· Heinrich vō Oftertingē vn̄ Klingeſoꝛ vō Vngerlant·
[220r]
vō Oft̾tingē·
Das erſte ſingen nv hie tůt·
heinrich vō oft̾tingē in des edeln fúrſten don·
vō dúringē lant d̾ teilt vns ie ſin gv̊t·
vn̄ wir im gotes lon·
d̾ meiſter gat in kreiſes zil·
gegen allen ſingern die nv leben er vf gewoꝛfen hat·
die benennet er ſi wening od̾ vil·
alſam ein kēpfe er ſtat·
nv hoͤꝛent wer des kampfes kan gegē allen meiſt̾n pflegē·
deſ fúrſtē tvgent vſ oͤſterrich wil er vf die wage legen·
ob ſi im die nv wider wegē·
mit dꝛier fúrſten milte die hohſtē die ſi haben megen·
hant die alle nv ſo hohē pꝛiſ an tvgendē lebē·
in diebeſ wiſ
wil er ſich deſ gevangē húte gebē·
her walther·
Nv hebet ſich mit ſchirmēſlegē·
walther vō der vogelweide ſo bin ich genāt·
vnbilde wil an mir den zoꝛn erwegē·
dc oͤſterrich dc lant·
vn̄ ich zehaſſe ſin gedingē
dar zv̊ die w̾dē dieneſtman ir gvnſt ich iemer hol·
des edeln fúrſten ſi vō mir v̾zigē
ê ich vmbilde dol·
moꝛgē las ich ſchowen wer nv ſi der edel degen·
dem alle fúrſtē mv̊ſſē gebē dvr ſine tvgende wich·
vō frankrich wil ich dar wegē·
d̾ kúnic hat me ṕſes danne d̾ edel vſ oͤſterrich·
ſwer hie enpfahet ſigeloſē teil·
dc iſt min ger·
dc wid vn̄ ſeil·
im ſchaffē balde ein haher moꝛgē her·
d̾ Schrib̾·
Her walther lât in talanc vꝛi·
ich tugenthafter ſchꝛiber tritte im zv̊ mit ſanges gir·
wie moͤhte ein fúrſte w̾der ſin danne dꝛi·
nv ſagent meiſter mir·
mit ſange ſine beſten tvgent·
wie er nah gotteſ hulde w̾be vn̄ doch zerw̾lte var·
der dúringe h̾re iſt milte vs kindeſ ivgent·
ob ime ein adelar·
zallē zitē iſt mit hohē flúgē her geweſen·
dar zv̊ hat er gegē viendē wol des edeln lewē mv̊t·
alexandern han ich geleſen·
dē kúnige er an ſinē oꝛdē wol geliche tůt·
ſin milte rich vn̄ ǒch die armē froͤwet·
ſin loͤwē mv̊t·
die manheit tv̊t·
er iſt voꝛ allen kúnigē vnbetroͤwet·
von Oftertingen·
Wa nv grieſwartē kampf iſt komen·
ich bin deſ kempfe vs oͤſt̾rich vn̄ kan die widerſlege·
zwene meiſter hant ſich angenomē·
dc niemā gegē in mege·
mit ſāge ſo iſt ir vꝛage ſcharpf·
ſwie doch ir eteſlichem volgē ſvͤſſe ſpꝛúche mitte·
Reimar vō zweter ſit ich din bedarf·
hoͤꝛe zv̊ nah trúwē ſitte·
vō eſchelbach der wiſe ſol d̾ ander kieſer weſen·
ſo ſin wir beidenthalbē wol gewaltes voꝛ in fri·
dc reht helfe mir geneſen·
wā es ſich nie vō im geſchiet d̾ hat die namē dꝛi·
her fúrſte heiſſent kieſen vf irn eide·
ſw̾ ſingē wil in todeſ zil·
entwichent niht dvrh liebe noch dvr leide·
von Oftertingen·
IR h̾ren hoͤꝛent mich ein teil·
des fúrſtē tvgent vſ oͤſt̾riche die wil ich úch zeln·
ſwē er wol getůt ſo wirt er geil·
got kvnde in ſelbe weln·
wand er dekeine tvgēt verbirt·
vn̄ doch nach goteſ hulde vaſte an dirre w̾lte ſtrebet·
ein krone im doꝛt in himelriche wirt·
nach ṕeſters lere er lebet·
wib ſint ſines h̾zen ſpil· den git er ſenftē grůſ·
er eret alle megede dur die maget die got gebar·
den klagendē tůt er kvmb̾ bv̊ſ
ſwc wiſer man erdenkē kan die tvgēt hat er gar·
er haltet ǒch gegē kúnige wol ſin zil
er iſt ein kint·
an wizen blint·
ſwer fúrſtē dꝛi gegen ime pꝛiſen wil·
d̾ Schrib̾
Siben fúrſtē ſint des w̾t·
des ein roͤmeſch kv́nic eniſt zeweln benant·
die enkieſent niht wā ſwes d̾ edel gert
h̾mā vō dúringē lant·
iſt dāne d̾ kúnic ze kvrz ze lanc·
dc er dē riche vn̄ ǒch d̾ w̾lte niht ſchaffet froͤidē vil·
d̾ dv́ringe h̾re nimt es im ſvnd̾ danc·
vn̄ ſetzet ſwen er wil·
dc ſahent ir an keiſer ottē da vō bꝛúnſwic·
den ſchiet er vō dē riche er tet in manig̾ eren fri·
heinrich vō oft̾ingē ſwic·
vn̄ ṕſe gegē ein and̾ niht dc vngeliche ſi·
ſwelh leit hvnt ie ſv̊hte vnrehte vart
des ſint gemāt·
ein ſtrafē im wart·
bi miner zit vō ſines meiſt̾s hant·
von Oftertingen·
Her ſchꝛib̾ ir der kvnſt niht hant·
dc ir min meiſt̾ mv́gent ſin· als úwer mvnt v̾iach·
reimar vō zweter ſi darzv̊ benāt·
vn̄ d̾ vō eſchelbach·
[220v] h̾ walther den ich geſter ſach·
ſwc meiſt̾ iſt in tútſchen landen hie vn̄ anderſwa·
ein kreie zv̊ eim edeln valken ſpꝛach
her gugguc ſint ir da·
der ſelbē kreiē hant ir an mir wol getan gelich
her ſchꝛiber[WS 1] do ir vō dem leit hvnde kvndet ſagen·
ich bin úch doch zekv́nſte rich·
ia mvͤſſēt ir in welfes wiſ an wid̾verte iagē·
min tihtē iſt vō meiſt̾kv́nſtē ſleht·
ich wil úch wern·
růpꝛeht min kneht
mv̊s úwer har gelich den tôꝛen ſchern·
ſchꝛib̾
Nv wirt geſvngē ane vꝛide·
ſwie úw̾ kneht min reides har gelich den toꝛē ſcher·
her walther komēt balde mit d̾ wide·
den haher bꝛingēt her·
ſo erzeige ich was min kvnſt vermac·
dc mvͤſſē an mir ſchowē beide frowē vn̄ man·
ſwēne ich geſinge diſen ganzē tac·
alrerſt ſo heb ich an·
ia enwirt iv niemer kūt vō oͤſterrich des fúrſten grůs·
nv hoͤꝛet wie vnſer ſingē iſt mit woꝛtē vs geleit·
vō ýſenache ſtempfel mv̊s
ob vns nv beidē ſtan· alhie mit ſinē ſw̾te bꝛeit·
er rihte ab vnſer eime in rǒbes ſitte·
dē man valles iehe·
d̾ and̾s bitte·
dē wúnſche ich dc im h̾zeleit geſchehe·
Oft̾tīgē
Ia vō dē fůs vnz vf dē gebel·
lobt nv dú w̾lt dē reine w̾dē helt vs oͤſterrich·
alle w̾lt dē reine w̾dē helt vs oͤſterrich·
alle fúrſtē ſint gegen im ein nebel·
wan er iſt dē ſvnnē gelich·
welt ir úch laſſen tv̊n bekant·
wes pfliget d̾ milte vs oͤſterrich· des iſt ſin ere bꝛeit·
ſwelhem edeln man er git gewāt·
des wib wirt ǒch bekleit·
den frowē ſendet er zehvs mit ſiner miltē hant·
dc ſú mit eren ſpꝛechē mac diſ gab d̾ fúrſte riche·
her ſchꝛiber ſv̊chēt ellú lant·
wa vindet fúrſtē dꝛi die ſiner tvgēt w̾ent geliche·
min meiſt̾s kvnſt git iv dē vierdē ǒch
vō der beſten kúr·
ir tvmb̾ gǒch
nv bꝛīget hieher lop mit rehte fúr·
ſchrib̾
Ein milte iſt hohē eren gelich·
als der vō oftertinge ſpꝛichet vmb der[WS 2] frowē war·
ſin tvgēt der vil edel vſ oͤſterrich·
vō der dúringe h̾re hat·
d̾ fúrſte vs dúringē hat erſtrebet·
dc aller pꝛiſ bi im behuſet iſt vō kindes ivgēt·
ſwas kv́nige in al der kriſtenheite lebet·
die hant vō im ir tvgēt·
er loͤſchet māge ſchande· ſam der pꝛieſter ſv́nde tůt·
ſwēne der dē ſv́nder in der rehten rúwe ſiht·
zv̊zim ſo fluſſet h̾ren blůt[WS 3]·
dē g̾nden tůt er kvmb̾s bv̊s· als mir dú menige giht·
ir reinē frowē vs d̾ dúringer lant·
d̾ mich hies gǒch·
es w̾e genāt
vō mir ſin mv̊ter dvrh ſich laſſe ich dc ǒch·
von Oft̾tingē·
Der dúriger h̾re iſt vs der ivgēt·
erwahſen ſo dc ſine landes fúrſtē gebent im wich·
er gewinnet niem̾ doch ſo hohe tvgēt·
als d̾ vſ oͤſterrich·
alle mine vinger wellēt ſwern·
dc ſin vil reines h̾ze niht wan denket alle tage·
wie er mv́ge doꝛt die ſele ernern·
vn̄ hie d̾ w̾lte behage·
wan ſiht in oͤſterriche zv̊ den edeln fúrſtē varn·
vil manigē ſende gerndē mā dē tůt er kvmb̾s fri·
alſam dú bin zv̊ den karn·
mit froͤidē vallent ob ir rechet wie ſis dꝛinne ſi·
ich wil dc ſtenpfel niem̾ me geſparn·
dc leben min·
ein adelar
ſi ſo and̾n mvͤſſen valken ſin·
h̾ Biterolf·
ICh bitterolf mv̊s iezvnt dar·
d̾ zoꝛn wil langer ſwigen niht· her ſchꝛiber dagēt mir·
ich ſihe ein âs voꝛ mir d̾ húte bar·
vn̄ kom in rappē gir·
ein kater duhte ſich ſo zart·
dc er die ſvnnē frijen wolte ſo ſi fruͤge vf gienc·
vn̄ nam doch ſit nach ſiner rehtē art·
ein tier dc mv́ſe vienc·
ein tvmb̾ ſties d̾ pfannē ſtil ins venſt̾ an dem toꝛ·
dv́ ſchůffe moht niht hin mitte nv m̾kēt wies geſchach·
dc bꝛeite iſt alles noch hie voꝛ·
walth̾ Reimar ir aller meiſt̾ d̾ vō eſchelbach
min kvnſt lat ǒch wol ſchowen wc ich kan·
an diſem tage·
dich tvmb̾ man·
heinrich vō oftertingē od̾ trage·
vō Oft̾tingē·
Bitterolf ich ſage dir
min biſpel noch min ſingē dvr din troͤwē niht v̾birt·
ſwa mv́ſe loufent eine katzen an·
ob dú erbiſſē wirt
ſo mv̊s d̾ mv́ſen ſin gar vil·
ir tvmbē [221r] ſinger tv̊nt den kleinē tiern an mir gelich·
ſo ſten ich alles in der katzen zil·
vn̄ bîſſe alvmbe mich·
io het ich zv̊ der dv́ringe h̾ren ſelbe wol die pfliht·
dc kúnic noch keiſer niht ſo rehte w̾dekliche lebt·
wêre der vs oͤſterrich niht
des tvgēt ob allē fúrſtē in ſo hoher wirde ſwebt·
ſw̾ den edeln fúrſtē an geſiht·
vſ oͤſterrich·
dv́ menge giht·
ſin milte tvgent ſi dē adelar gelich·
Biterolf·
Stempfel dꝛit vns naher bi·
ſo mvͤſſe ich nv erſtochē w̾den in eines diebes zil·
vinde ich niht einē gravē wandels fri·
als ich es beſcheidē wil·
wer wc zemegenze da geſchach·
dc mā den fůlder fúrſten wolte krenkē hohes reht·
d̾ dv́ringe h̾re dē ſtv̊ll vō koͤlne bꝛach·
vn̄ mahte krv̄be ſleht·
da wc vil manic w̾der degē die hattē groſſē zoꝛn·
da wurdē tvſent ſw̾t geruket an d̾ ſelbē ſtat·
vō hēnenb̾c der hohgeboꝛn·
in eines lewē mv̊te er fúr d̾ dúringer h̾rē trat·
vō ſtahel ein beggel hube wart gezoget
des tages genv̊g·
dē edeln voget
man totē da hin fúr den keiſˢ trůg·
h̾ Biterolf·
Mag ere bi der manheit ſin·
ſcham vn̄ milte trúwe dc erbarmvnge in geſtat·
vō dúringē landes h̾re ſtêt mir bi·
dc er dis alles hat·
da gabent genv̊ge fúrſten wich·
do trat er fúr der dv́ring̾ h̾rē in eines dꝛakē kúr·
das ſach der edel helt vs oͤſterrich·
her heinrich bꝛinget fúr·
wa hat d̾ edel vſ oͤſterrich ſo hohe pꝛiſ getan·
alſ d̾ hēnenb̾ger doꝛt voꝛ dem vō divringen lant·
lât in voꝛ dē edelen ſtan·
es w̾e dem b̾ner genv̊c geweſen do in h̾re egge vāt·
der fúrſte ſpꝛach ia hat er wol dē mv̊t·
dc dꝛiſſeg lant
vn̄ alle ir gv̊t·
zeſinem ellē w̾en wol bewāt·
von Oft̾tingen·
Ich wil der dúringer h̾ren gebē·
zehelfe den vō bꝛandenburg dē hēnenb̾ger doꝛt·
kvnde der vō oͤſterrich niht ſchoner lebē·
ſo tů mich ſtempfel moꝛt·
got im noch ǒgē zwei beſcher·
in ſinē nac vn̄ hende zwo dc were des h̾zen leben·
ſwēne er ſich mit den zwein gegē den vîendē wer·
dc zwo den varndē gebē·
do man d̾ vnger kúnic in haſſe gegē den fúrſtē ſach·
den ſchilt er zů dem arme warf· mit ellenthafter hant
zv̊ ſîme kamerere er ſp̋ch·
nv ſchaffe dc der gerndē diet erloͤſet ſin dú pfant·
ſi mvͤſſent h̾re tugende ſich v̾ſtan·
die ſingens pflegent·
al ſvnd̾ wā·
ſi tôꝛn die dꝛîe fúrſtē gegē im wegēt·
h̾ Reimar·
Ein fúrſtin vn̄ ir frowē ſint·
vns beidē alzenahe bi dc wirt von mir geklaget·
voꝛ zoꝛne mv̊s ich zabeln als ein kint·
dē man dc ei v̾ſaget·
dineſ ſchalles iſt nv gar zevil·
heinrich vō oft̾tingē Reimar wil din vient weſen·
wā ſwer ſich ſelbē dankes toͤtē wil·
wer hulfe dē geneſen·
ia mac d̾ edel vſ oͤſterrich d̾ tvgende niht getragē·
als dúring̾ h̾re nv voꝛ allē fúrſtē hat·
ſwer vb̾ledet ſinē wagē·
d̾ bꝛichet lihte din ſanc vs eineſ tôꝛen mvnde gat·
ſwēne alle fúrſtē htē engel namen·
al ſvnd̾ ſpot·
vn̄ ane ſchamen·
ſo were der dv́ringer herre wol ir got·
Von Oft̾tingen·
Reimar[WS 4] v̾nim wes ich dich mane·
dis biſpel dine tvmpheit dur din dꝛoͤwen niht v̾birt·
ſwa mv́ſe lǒfent eine katzē ane·
ob dú dur biſſen wirt·
da mv̊s d̾ mv́ſe ſin gar vil·
ir tvmbē ſinger tv̊nt den kleinē tierlin wol gelich·
ſo ſtē ich alleſ in der katzē zil·
vn̄ biſſe alvmbe mich·
ſo het ich zv̊ der dúring̾ h̾ren ſelbe wol die pfliht·
dc kv́nic noch fúrſte vf erde niht ſo w̾dekliche lebt·
w̾e der vſ oͤſterriche niht·
des tugent in den lúftē ob al der w̾lte ſwebt·
ſwie man des lip hie vf der erdē ſihet·
vō oͤſterrich
dú w̾lt mir giht
ſin tugent ſtige eime adelarn gelich·
von Eſchelbach
Heinrich vō oft̾tingē ſage·
weiſtú wie got den túfel dvrh ſin vbermv̊te bāt·
ſol ich dich bindē dc iſt mines h̾zē klage·
ī miner h̾ren lant·
vō eſchelbach ich wolfram
ob dv beheftet biſt mv̊s bannen dich in prieſters wiſ·
mir werē alle frowē dꝛvmbe gram
lieſ ich dir ſanges pꝛiſ·
d̾ dúringer h̾re wolte ich han fúr [221v] manig̾ kúnige leben·
got gab in allē fúrſten dc ſi bilde bi im nemen·
die hie nach wirde kvnnē ſtrebē·
vn̄ doꝛt nach gotes huldē ringen· vn̄ hie d̾ w̾lte gezemen·
heinrich vō oft̾tingē tů dē ſegē·
la ir ſin gach
vil hagels regē·
zoget dir mit donres blikē von mir nach·
von oftertingen·
Her t̾ramer ſit willekomē·
io dꝛinget mich dú heidenſchaft mit manig krîe don·
noch húte wirt ein ſturn vō mir v̾nomē·
dc der vō arbon·
gewalteklich nie gehielt·
do er der heidē vil v̾ſchꝛiet als im dú menge iach·
vf aliſchantz er genv̊c der helme ſpielt·
vn̄ lanzen vil zerb̋ch·
ein froſch vs ſvͤſſem tǒwe ſpꝛanc in eine heiſſe glůt·
vnkv́nde foͤꝛhte mvͤient manigē der ſi ſv̊chē wil·
dem froͤſche ir wol geliche tůt·
ir woltēt ſv̊chē furt an mir deſ iſt úch gar zevil·
walther Reimar der ſchꝛiber bitterolf·
hant genſe wan
ſo ſú den wolf
erkennēt vn̄ wellent vs dē zúnen gan·
Her walther vō der vogel·
Ich walther kvme in ſanges klage·
heinrich vō oft̾tingē ſage wie haſt dvs gedaht·
dc ich dir dinen vbermv̊t v̾trage·
d̾ mich in zoꝛn hat bꝛaht·
min zvnge wc ein teil zeſnel·
dc ich mich des vō oͤſterrich hate gar v̾zigē·
dc ſi v̾ſwellē mvͤſſe vn̄ ǒch dú kel·
wil zoꝛn an mir geſigē·
ich han getā rehte als der vonſ túfels rate ſlant·
den iapfel vn̄ wc doch niht des mv̊tes ſinewel·
dc woꝛt ich niem̾ me v̾uant·
moͤht ichs ergriten ſam dc obs ich bꝛeche es vs der kel·
vil hohgelopter edelr fúrſte w̾t·
von oͤſterrich
min krie gert·
v̾kús nach goteſ oꝛden wider mich·
diſ ſanc her walth̾ ein teil· vn̄ entwúrte im d̾ von oft̾tingē in dē ſelben liede·
her walther·
Ein kvnic vn̄ zwene fúrſten rich·
ſint vſ genomē ſo pꝛuͤue ich alle die w̾lt zv̊ ſterne glaſt·
die beſtē ſint dē moꝛgē ſt̾nē gelich·
ſwēne d̾ ie frůge vf bꝛaſt·
ich enmac es langer niht v̾dagē·
d̾ zweier fúrſtē einer wol d̾ ſvnnē gelich hat·
div die truͤbē wolkē kan v̾iagē·
als ſi gar luter ſtat·
heinrich vō oft̾tingē ſage wer mac d̾ edel ſin·
des tvgēt voꝛ allē fúrſtē kā der ſvnnē geliche weſē·
vō oͤſterrich der herre min·
vō ſiner milte wirt noch vil geſvngē vn̄ geleſen·
nv hoͤꝛent ob ich in rehte meſſen kan·
alſwa er gat·
loͤwe vn̄ man·
der zweier h̾ze vn̄ erbarmvnge er hat·
her walther vō der vogel·
Ia mv̊s der tac me ṕſes han·
dāne ſvnne ſt̾ne oder mâne als ichs beſcheidē wil·
deſ mvͤſſen hohe pfaffen mir geſtan·
vn̄ wiſer leigē vil·
mac ich gezúge niht entweſen·
ſo ſv̊che ich w̾de meiſter wiſe hie vn̄ anderſ wa·
ich meine die die biblien hant geleſen·
des landes cronica·
ir edeln dúrīge heſſen franken ſwabe lânt úch ſagē·
wer mac der fúrſte ſin· der al der w̾lte iſt vber gelich·
der dúringer h̾re kā vnſ tagen·
ſo get im nach ein ſvnnē ſchin· der edel vſ oͤſterrich·
der tac die w̾lt wilde vn̄ zam erfroͤwet
daſt wol bekant·
mit froͤide ſtroͤwet
er vns ſin gůt· h̾man vs dúringen lant·
von oftertingen·
Heinrich vō oftertingē klaget·
dc man im lege in dúringē vngeliche wúrfel fúr·
walth̾ mit valſche pꝛis an mir beiaget·
daſt niht nach trúwē kúr·
ê d̾ vō oͤſterrich gê·
dekeinē fúrſtē nach· ſwie er zer ſvnnē ſi benant·
ich beite din vn̄ wereſt vb̾ ſe·
klinſoꝛ vs vnger lant·
ich mv̊s an dich beruͤfen vn̄ kā dich vs erweln·
din meiſters kvnſt voꝛ allē ſingern nv iſt vs erkoꝛn·
ob du des mers gries ſolt zeln·
vn̄ alle ſternē ſvnd̾ nennē· ich bin vnu̾loꝛn·
ich wil in ſv̊chē daſt nv min ger
in vng̾lant·
klinſoꝛe mv̊s her·
dē iſt dv́ tvgent ī oͤſt̾rich erkant·
von eſchelbach·
Wir meiſt̾ woltē ſinē tot·
vil ofte ſtempfel wart genant er ſolt bereitet weſē·
dú fúrſtin ſpꝛach ſwem ich min hant ie bot·
d̾ lât in wol geneſen·
walth̾ her ſchꝛiber lat úch ſagē·
ob ich mit gabe ie wc fúr kumb̾ úwer keines tach·
ſo ſvlt ir úwern zoꝛn durch mich v̾dagē·
ſit es voꝛ mir geſchach·
die keiſer ſpꝛachē frowe an vns geſchiht al úwer ger·
[222r] ia waren vnſer ſinne ie zaller zit an úch gewant·
lât in den klinſoꝛ bꝛingen her
es wirt vil lihte lanc ê er in vinde in vnger lant·
ſú ſpꝛachēt lant in varn dar nach erſtat·
in diſem zil·
fúr megēze gat·
die wile des claren rines vil·
hie iſt Clinſoꝛ komē vn̄ ſinget er vn̄ der vō eſchelbach wider ein ander· vn̄ vahet daſ Clinſoꝛ an· vn̄ ſinget diu dꝛú lieder div hie nach geſchꝛiben ſtant·
Ein vater ſinem kinde rief·
voꝛ eines ſewes tamme lag es vn̄ ſlief·
nv wache kint· ia weke ich dich durh trúwe·
diſen ſe den tribet wint·
ſo kvmt dú naht gar vinſter wache liebeſ kint·
v̾lúre ich dich ſo wirt min iamer núwe·
dannoch dc kint des ſlafes pflag hoͤꝛent wie der vater tete·
er ſleich hin naher da es lac·
mit ſiner hant gab er im einē beſmen ſlac·
er ſpꝛach nv wache kint es wirt ze ſpete·
klingſoꝛ·
Dem vater wart vō ſchuldē zoꝛn·
vs ſinem mv̄de erſchalt er do ein helleſ hoꝛn·
er ſpꝛach nv wache noch ein tvmber tôꝛe·
da vō ſin zoꝛn im wol gezam·
dc kint er bi ſim reidē valwē hare nam·
er gab im einē baggē ſlac ans oꝛe·
er ſp̋ch din herze iſt dir vermoſet ich mv̊s mih din enziehē·
kan dich min hoꝛn niht fúr getragē·
vn̄ ǒch der beſme da mit ich dich habe geſlagē·
noch hilf ich dir wilt dv dem wage enpfliehē·
klingſoꝛ·
Clinſoꝛ vs vngerlant mir iach·
d̾ vat̾ wider zv̊ dem liebē kinde ſach·
mit iamer er dv́ ǒgē gegē im wante·
da vō wart ſin gemvͤte ſcharf·
mit einē ſlegel er zv̊ dem lieben kinde warf·
er ſpꝛach nim war den bottē ich dir ſante·
ezýdemō ein ter din pflac dc wc gar ſvnd̾ galle·
da fúr nêm dv eins luhſes rât·
der dich in diſen valſchē ſlaf gedꝛungē hat·
ſvs bꝛach der tam vn̄ kan der ſe mit ſchalle·
von eſchelbach[WS 5]
Clinſoꝛ ich loͤſe dir die knottē·
nv dol dc wiſer meiſter dvr die zwelf botten·
ob ich in dines ſinnes ſêwe iht ſchepfe·
v̾wirre ich mich in diſem hamē·
din ſtrafen wil ich dvldē meiſter ſvnd̾ ſchamē·
nv lache ob mich min tvmpheit hie beklepfe·
ich ſage dir wer dē kinde rief altiſſimvs der ſtarke·
ein ieglich ſv́nder iſt daſ kint·
gotes hoꝛn die wiſen meiſt̾ pfaffē ſint·
ſvs ſwebt in diner kv́nſte ſe min arke·
klīgſoꝛ·
Ia meiſter loͤſe vns bas den haft·
dc git d̾ werlte maniger ſeldē hohe kraft·
ſwer es merkē wil der lâſſet māge ſv́nde·
min ſin was al der w̾lte zetief·
ē dc mir vō oft̾tingē heinrich rief·
nv vindeſt dv die hoͤhe vn̄ ǒch die grúnde·
drú tuſent marc in vngerlant die han ich vō den richē·
welle ich die habe voꝛ dir ſparn·
wilt dv mit mir gegē ſiben búrgē varn·
ſo mvͤſſe got an ſeldē mir geſwichē·
Eſchelbach·
Sint mir die ſinne in h̾zen zam·
ſo wil ich dir beſcheidē vō des ſewes tam·
dc iſt ein zit dc dir got hat geſpꝛochen·
v̾wúrkeſt aber dv dú zit·
gelǒbe mir an aller ſlahte wider ſtrit·
ſo haſt dv ſelber dir den tam zerbꝛochē·
der ſê ſint dinú komēden iar din tage· dc ſint die winde·
din engel iſt ezýdemō·
der luhs den tiefel tútet der dir ſvren lon·
kan gebē ſvs wen ich dine rîme ich vinde·
Eſchelbach
Nv hoͤꝛe ob ich iht kv̄ne ſpehen·
den beſmē ſlag got lât an frúndē dir beſchehē·
grôs herzeleit daſ iſt ſin erſtes ſtrafen·
wirſtv an beſſerunge ſchiech·
den baggē ſlac den m̾ke dv wirſt ſelber ſiech·
wiltv zelange in dinē ſv́ndē ſlafen·
des ſlegels wurf dc iſt d̾ tot dē er danne an dich ſendet·
rúwe vn̄ bihte er vō dir gert·
wirt er der beider vollekliche niht gewert·
din helle pin iſt iem̾ vnverendet·
klingſoꝛ
Ein kúnic d̾ hat liebe kint·
ivncfroͤwelin voꝛ ivgent ſi niht gekroͤnet ſint·
vn̄ wirt in hohe krone doh gemeſſē·
zwei mānes bilde er da geſach·
ze rehter ê er im der ſchoͤnē kinde iach·
er ſpꝛach ich wil mih gegē úch niht v̾geſſen·
úch vn̄ úwer frúndin ich bi zwenzer wochē kroͤne·
dc ir alleine krone traget·
vf hǒbtē zwein ſwer [222v] mir dis froͤmde wūder ſaget·
d̾ dunket mich an meiſters kúnſtē ſchoͤne·
klingſoꝛ·
Der eine frúnt gewā den ſin·
dc er tet der ſinē ſchoͤnē frúndelin·
groſ h̾zeleit vn̄ manige iamers pine·
er ſlůg an ſi mit doꝛnē ſcharpf·
vnder ſine fuͤſſe er ſi vil ofte warf·
vn̄ ſoldes in dem pfv̊le bi dē ſwine·
dc ſach der kúnig zeiner zit d̾ in die krone here·
gab deſ mv̊ſt im zoꝛn gezemē·
er ſpꝛach zehant ich mv̊s mich úwer beid̾ ſchemē·
min ǒgē ſvlnt úch ſehē niem̾ m̾e·
klīgſoꝛ
Dú ander magt leit groſſe not·
vō ir friedel ofte ir ǒgē wurdē rot·
nv merke wiſer meiſter wc ich ſinge·
er warf an ſi gar ſmehē miſt·
dar nach erdaht er einē wūd̾lichen liſt·
dc er ſi trůc zv̊ zeineſ bꝛvnnē ſpꝛinge·
er wuſch mit gůtē willē abe ſwa er ſi hat entreinet·
dc im d̾ kúnig gvnſte iach·
vf diſ ſelbe zimb̾ hoͤꝛt vō erz ein tach·
ich mv̊s in pꝛiſen ſwer mirs rehte erſcheinet·
vō Eſchelbach
Sit ich mit erze tekē ſol·
got vō himel iſt d̾ kúnig ſo pꝛuͤue ich wol·
zwo ſelē bi den ſchoͤnē kindē beidē·
die mānes bilde tragent wib·
tote vō der ſele lebēdig wirt ir lip·
ſi habent der krone niht die wile ſi heidē·
ſint die bꝛinget in d̾ tǒf bi zwenzec wochē riche·
diſ tragēt die vier vf hǒbtē zwein·
ſwer mir dc wid̾ wirfet der mv̊s ſpꝛechē mein·
ſus deke ich froͤmdeſ zimb̾ meiſt̾liche·
Eſchilbach
Nv merke ein man vn̄ ſelic wib·
wie nv die ſele pinē kan ein valſch̾ lip·
vnkúſche wert ich pꝛuͤue bi dē doꝛnen·
ſwēne ſo dc h̾ze tůt den mein·
dc es vn̄ ǒch dú zūge hellent niht enein·
ſo triteſt dv mir fuͤſſen vs erkoꝛnē·
alſvs d̾ lip die ſele kan in diſem pfůle vnreinē·
ſwēne er ſi in die ſv́nde leit·
vn̄ niht dur weſchē zv̊ deſ bꝛvnnē ſpꝛunge treit·
got ſchamt ſich ſin ſwes lebē kan ſo v̾ſteinē·
eſchilbach
Der ſine frúndelīne trůc·
ze deſ bꝛvnnē ſpꝛvnc ſwie froͤmde mirs din mv̊t gewůc·
dc wc ein man vn̄ hatte gv̊te witze·
wir heiſſen ſv́nde ſmeh̾ miſt·
deſ bꝛv̄nē ſpꝛvng ein wol gewirdet pꝛieſt̾ iſt·
ſw̾ ſich nv huͤtē wil voꝛ helle hitze·
d̾ laſſe rúwe vn̄ ǒch den pꝛieſt̾ ſich mit ſtrafe rechen·
ſo git d̾ kúnic in froͤidē me·
d̾ ime die frúndelinne gab ze rehter ê·
ſwer beſſer meiſter ſi den heiſſent dekē·
h̾ walther·
Dv dekeſt dc ich niht kan wern·
des wellēt mir die trehene minú ǒgē ſern·
fúr war ein wiſer engel dc erdahte·
dc heinrich vō oft̾ting·
dē krieg ie vant da vō ſich hůb deſ bꝛūnen ſpꝛing·
vn̄ er dich meiſter her zelande bꝛahte·
walther vō der vogelweide ſo bin ich genēnet·
vō ſange ſoſt mir niender kvnt·
der ſo v̾re ſv̊che hoͤhe vn̄ ǒch den grunt·
dc hat min h̾ze als einē ſchǒb enbꝛēnet·
Ze paris gůte ſchůle ich vant·
ze Conſtantinopel iſt mir wol erkant·
d̾ kern vō kvnſt vs meiſt̾ pfaffē ſinne·
zebaldac ich zeſchv̊le kam·
wand ich zebabýlone hohe kvnſt v̾nam·
dꝛú iar ich diēde ī machemetes mīne·
der kvnde mir dc h̾ze wol vō rehtē ſinnē wiſen·
dc wc der heidēſchefte ſpot·
roͤmſche pfaffē hoͤꝛent wir hant einē got·
er iſt ſins kindeſ kīt den wir da pꝛiſen·
wolfram
Es giengē ſchaf an einē graſ·
d̾ hv̊ten hirtē fúnfe als vil als do der ſchafe wc·
nv hoͤꝛent froͤmde wūderliche tvkke·
dú zwei dú ſaten vf dc gras·
ſalzes vil ich wēne dú eine ein frowe was·
vn̄ trůg vil krūber ſtebe vf ir rugge·
ſi wiſte einē trakē ſtark ze walde bi gevilde·
der in dú ſchaf durh girde fras·
ſi lechtē in fúr den drúſſel dur ſalzeſ dꝛaſ·
ſvs wurdē ſi irem rehtē meiſt̾ wilde·
wolfram·
ICh mein ob in des ſalzes vart·
wirt niht benomē der dꝛitte hirte iſt von d̾ art·
daſ in waſſer dar mit liſtē flúſſet keret·
zwo frowē ſiht man bi in ſtan·
ſo ſint die hirtē fúnfe die man da ſach gan·
ſi riefens an nv helfet vn̄ leret·
dú zwei du wellēt vns dú ſchaf benemē dc iſt mir leide·
dú ſehſte zúrnē niht v̾birt·
ſi ſpꝛach ſi lekkent ſaltz dc in zegallē wirt·
ſi ſint v̾loꝛn ſwēne ich mich von in ſcheide·
klingſoꝛ
[223r] Von babilone baſiant·
d̾ mit ſinē liſten an den ſt̾nen vant·
wie man vs kupfer clares golt gewīnet·
d̾ iſt ein blafůs vf der vart·
min hohe kvnſt im ſtiget fúr in valken art·
nv hat vns einē leigē bas beſinnet·
d̾ aller wūd̾ hat gewalt ein got vnwandelbere·
gegē dē erzeige ich ſolhē ſin·
mit ſange iſt dc ich einē tac bi lebēne bin·
ſwer vindet grūt der iſt ein mer wattere·
klingſoꝛ·
Wolfram ich laſſe dich niem̾ fri·
nv ſich dar zv̊ weſ kvnſt dar vnd̾ beſſer ſi·
min kvnſt al dine ſinne mv̊s erſchellē·
dv mv̊ſt ǒch ellú minú zil·
die grúnde vn̄ ǒch die hoͤhe varn ſwar ich wil·
leuiathan vn̄ and̾ ſin geſellē·
die mvͤſſent mir ein gǒggel ſpil vs diner kv́nſte machē·
ſemmir ih̾c der megde kint·
d̾ vns erloſte wir werē anders alle blint·
an dem gelǒbē kan mich niemā ſwachē·
klingſoꝛ·
Nv ſage mit meiſt̾ ſvnd̾ has·
wan vindet dc man gotes tǒgē fúrebas·
niht ſůchē ſol ſwer weſen wil bi ſinne·
ein quater mit vier eſſen ſtat·
dc iegeliches ſine gezierle ſvnd̾ hat·
nv hoͤꝛe wie ich dis halbes ſagē begīne·
das quater eine dꝛien habet ſo heltet es die dꝛie·
ſwer nv da fúrbas ſinnē wil·
dem mac d̾ ham wol riſen vf des hirnes zil·
vn̄ wirt vō allē witzen gar der vꝛîe·
eſchilbach
So hies ich niender wolferam·
vn̄ kvnde ich dine wilden woꝛt niht machē zam·
was hulfe ſante bꝛandā mich d̾ wiſe·
d̾ in dc vinſterniſſe kam·
vn̄ er das bv̊ch vō eines ohſen zvnge nam·
dē ohſē ich dir zeinē eſſe ṕſe·
das and̾ eſſe daſt ein loͤwe ob ich es rehte merke·
dc dꝛitte ein ar dc iſt mir kvnt·
dc vierte ein mēſche ich ruͤre an dines ſeweſ grūt·
vn̄ ſchat doch gotte niht an ſiner ſterke·
klingſoꝛ·
Ich wil gelǒben dc dē liſt·
ein engel vindet alde der túfel in dir iſt·
nv hoͤꝛe vō dúringē fúrſte riche·
ich wils ǒch allen pfaffen klagē·
die den úbeln geiſtē argē willē tragē·
her ſathanas ob ich úch hie entwiche·
dc kan doch balde niht geſchehen ſwie gerne ir mich nv krenket·
ir mvͤſſet rumē mir das vas·
welt ir in minē wage iht wattē fúrebas·
ich vinde noch dc úch zegrunde ſenket·
klingſoꝛ·
Swer dich wil habē in leigē pfliht·
wolferam der hat der rehtē witze niht·
aſtronomie dú iſt dir genême·
wiltv dichs niht gegen mir enbarn·
naſýon der túfel mv̊s mirs doch ervarn·
noh hinaht ſwēne er vindet dich alleine·
ſemmir ih̾c der megde ſvn vō tolvs ich in bꝛinge·
ald ob er wer in kriechē lant·
er tv̊t mir alle dine kvnſt vō grvnde erkant·
nv huͤte dich ſwie ich mit im gedinge·
von eſchilbach
Ich wolferā mv̊s mich bewegē·
ſwc dv vn̄ dine tieuel kv́nſte mv́gent gepflegē·
die bꝛīge vns her wā ich alhie bezúge·
dc ich dc quater rehte vant·
auguſtinꝰ der ſi min gezúc benant·
vn̄ daniel mit dē ich niht entrúge·
leronimꝰ d̾ nam dc bůch bꝛandā vs ſiner hende·
da vō es kam in ſchoten lant·
ich froͤite mich dc ich die hohē wirde vant·
er zage ſwer hie den ruggen flúhtic wende·
klingſoꝛ·
Dv haſt Iˢonimꝰ genant·
da mitte bꝛandane[WS 6] helle vn̄ erde wart bekant·
wafēna was d̾ himel kan bedekē·
ein engel gab dē wiſen man
ein bv̊ch da vō er manig h̾zeleit gewā·
do er die ſchꝛift gelas an einer eggē·
er zêh dē engel vn̄ dc bůch gar trugehafter mere·
voꝛ zoꝛne warf ers in die glv̊t·
d̾ engel ſpꝛach ſit dis din vngelǒbe tůt·
dv mv̊ſt es wid̾ holn mit maniger ſwere·
hie mitte warē[WS 7] ſi des tages geſcheidē· vn̄ kan der túfel Nafion vn̄ ſang dis liet·
Nv ſage haſtv meiſterſchaft·
wie dc firmam̄te mit vil hoher kraft·
gegē den planetē allē wil gekriegē·
vn̄ d̾ polvs artanticꝰ
dar zv̊ der hohe meiſter ſtern antribiluſ·
nv ſage mir war dv kāſt mich niht betriegen·
ſaturnꝰ ſwēne er oſten ſtat wc tútet vns ſin wund̾·
kanſt dv der eines mir geſagē·
min mv̊ien wil ich gar gegē dir v̾dagen·
wand ich dirs alles han genant beſvnder·
Eſchelbach
[223v] Wolframes zoꝛn was ſo bereit·
dc in d̾ túfel mv̊te vil dc wc im leit·
er ſpꝛach in weis niht wc din frage meinet·
ich enrůch wies oſten weſt̾n ſtat·
in weis wie iegelich ſt̾ne nach ſinē cirgel gat·
d̾ ſi geſchv̊f der hat ir ganc v̾einet·
clinſoꝛ hat dich har geſant mit ſiner zǒberie·
div wūder die dv haſt genant·
dú ſint ſo hoh dc ſi mir gar ſint vmbekant·
dc waltet ganz ein q̋tter vn̄ ein dꝛie·
Do ſpꝛach d̾ vō eſchilbach in kā dir ſin nit geſagē des wart der túfel zoꝛnig vn̄ ſāg aber dis liet·
Dvr was haſt dv mich har gemvͤt·
wolferam nv ſich her wie min leben gluͤt·
růrt ich dē enzēberc in diſem zoꝛne·
er mvͤſte ze úſeln w̾den gar·
ob ich iht me vō dinē ſchuldē irre var·
mag ich ſo wirſt dv vō mir d̾ verloꝛne·
dv biſt ein leige ſnippfen ſnav dú liet wil ich hie ſchꝛiben·
la clinſoꝛ ſine meiſterſchaft·
mvͤiet er mich her mit ſiner woꝛte kraft·
dir moͤhte lieb̾ ſin min doꝛt beliben·
wolfram·
Vmbe dine mvͤie iſt mir niht kvnt·
ich wolde ǒch dc dv wereſt an des meres grunt·
dc dich geſehe niemer me min ǒge·
der dc firmament gelâſſen hat·
vn̄ in des hant gar ellú dinc beſloſſē ſtat·
der ſchirme[WS 8] mich voꝛ dir mit ſiner tǒgē·
din komē iſt mir vnmaſſē leit dc zúge ich an die h̾en·
dú den gebar der ſi geſchv̊f
vn̄ loſt vns vō d̾ helle mit ſines todes růf·
maria maget růch vns vō ſchulden keren·
eſchilbach·
Wolfram ein krúze fúr ſich reis·
d̾ túſel fůr ſin weg voꝛ zoꝛne was im heis·
er furdert ſich niht langer er do beite·
er fůr ze klinſoꝛe ſan·
da ich da was dc iſt ein engeſlicher man·
er ſtreich fúr ſich die lenge vn̄ ǒch die bꝛeite·
dar vmbe kvm ich niht mere dar wie ich mit dir gedīgen·
dv mv̊ſt dar ſelbe zv̊ zim varn·
er iſt ſo klůg dv kanſt dich niemer deſ bewarn·
dir mvͤſſe an dinē erē miſſelingē·
Do ſi an dē and̾n moꝛgē ze houe kamē do ſeit her wolfram wie d̾ tieuel bi im was geweſen· do ſang her klingſoꝛ aber do dis liet·
Nigromāzie erkenne ich gar·
aſtronomie[WS 9] nim ich an dien ſternē war·
vinde ich die clamanie in rehter ahte·
ſo kvnde ich wol die warheit ſagē
dc allen pfaffē meiſtern mvͤſte wol behagē·
wie altiſſimuſ lvcifervm mahte·
vier dinc hat er an in bewant wilt dv dich des beheftē·
dc dv mir ſageſt ir vnderſcheit·
ſo hat got vil hohe wirde an dich geleit[WS 10]·
vn̄ biſt in hoher kvnſt mit meiſters kreften·
eſchilbach·
Sibillē kint felicia·
vn̄ ivno die mit artuſe beide ſint alda·
alſ mir nv ſante bꝛandan hat betútet·
d̾ clinſoꝛ tůt vns vnbekant·
vmb den bottē dē artus hat vs geſant·
vn̄ ſaget vns niend̾ wer die gloggē lútet·
altiſſimꝰ lucifeч hat gewoꝛht vs vier vvinden·
er gab im aqilones art·
me danne dekeines davō er hohuertic wart·
her klinſoꝛ ſeht ſvs kan ich wunder vinden·
klingſoꝛ
Der meiſter wening iſt benant·
den es ſi kvnt wan einer derſt in kriechē lant·
der ander in der babiloniē riche·
in ungerlant dan iſt ir niht·
wan ich bin hie dc h̾ze mir gegē pariſ giht·
da ſi ein meiſter der ſich mir geliche·
des bottē ich zv̊s wirtes maget mit woꝛtē han gebvndē·
fúnf tage mv̊s er da betagē·
der lert ſi manige wiſheit ſingen vn̄ ſagen·
ſo vert er hin ſo hat ſis vberwunden·
eſchilbach·
Do ſpꝛach der edel fúrſte wert·
dc wil ich ſelbe ſchowē bꝛinget vns dú pfert·
ich mac dekeines bottē dꝛvmbe erbitē·
iſt ſinnic wol deſ wirtes maget·
ſwc mir der clinſoꝛ iemer wunders danne geſaget·
ſo wil ich niemer tag da wider ſtriten·
dú fúrſtin ſpꝛach ich wil ǒch dar han wir die gemellichē·
an des wirtes magt v̾loꝛn·
dc mv̊s mir vf den klinſoꝛ lange weſen zoꝛn·
ſi gienc hin abe mit frowē tvgēderichen·
klingſoꝛ·
Nv hoͤꝛent warheit vn̄ ſin·
dc ich vō hoher kúnſte ein meiſt̾ pfaffe bin·
vs [224r] zwenzic kúnicrichē her gepferret·
nv tůt ein leige mir bekant·
ſolhe kvnſt dē ich hie ſv̊che in dúringē lant·
das ſin beſcheidē mine frage derret·
ich wolt ir all̾ ſinnes wag mit miner kvnſt erſchoͤpfē·
ich ſach ir einē ſigelos·
der den buggelere fúr den ſchilt erkos·
ſwie doch ſin ſwert gar hohe kvnde koͤpfen·
eſchilbach·
Dv́ lantgreuinne kam al dar·
ze wartberg vf den palas ſo wart man gewar·
vierzec frowē bi ir vn̄ dannoch m̾e·
der ahte hoh greunne ſint·
vō abenb̾g des hohgeboꝛnen w̾den kint·
dú fúrſtin zoh ſi fúr ſich dur ir ere·
wan es wc in ir ſelber hus· dc ſtvnt ir wol zepꝛiſe·
da ſach man dē vō eſchelbach·
als man horandē voꝛ der kúnigin hiltē ſach·
d̾ klīnſoꝛ ſpꝛach nv ſingent meiſt̾ wiſe·
klīgſoꝛ
Heinrich vō oft̾tingē hat·
dē ſchilt an mir ſwer mit dē buggelere ſtât·
der mac doch eine ſchanze wol v̾ſnellē·
der ſchꝛiber vn̄ bitterolf·
die ſehen lieber bi in einē wildē wolf·
dānoh wil walther ſich zů zin geſellē·
wolfrā vō eſchelbach der iſt ir aller buggel̾e·
der ſchirmet wol fúr ſw̾tes ſnit·
ſo weis ich kunſt da fliegent rútelinge mit·
vn̄ iſt ir ſmalē ſchirmē gar zeſwere·
vō eſchilbach
Swer wirfet rúttelinge ſcharpf·
vs kúnſte ſchilde alſā der klinſoꝛ zv̊ mir warf·
vn̄ ich des vnverſchꝛotē voꝛ im blibe·
ſo dc min ſin ī kreiſe ſtat·
min vf gewoꝛfen kvnſt mit ſv̊che gegē im gat·
dc er mich niht ein fůs dar hinder tribe·
mag dc vō legen kvnſt geſchehen des hat ein pfaffe ſchāde·
ich wils dur tútſche pꝛieſter lan·
min ſin was hoh in ſpꝛūgē der mv̊s liſe gan
dvrh das mans iht v̾neme in vngerlande·
klingſoꝛ
Nv wil ich pꝛuͤuē einē tanz·
vō ritterſchaft vn̄ ǒch vō edelē frowē glanz·
vil ſchoͤnre megde nv hoͤꝛent froͤmde mêre·
dar zv̊ w̾der knappē me·
vn̄ ǒch da bi ein ſchone maſſenie ſte·
in ṕſent ahte meiſter clingeſere·
nv merke ereg̾nder man ob man dich ſolte mietē·
dc dv geſt in deſ tanzes pfliht·
tů groſſe hǒbet ſchande zú zir angeſiht·
wan mv̊ſ dir vil gv̊tes dꝛvmbe bieten·
eſchilbach
Dv biſt der witze gar ein kint·
got vn̄ ǒch ſin mv̊ter dú ſint niend̾ blint·
ſi ſehent von dē himel dvr die ſteine·
die heiligē vn̄ der engel vil·
noh verre hoher ſint dāne deſ tanzes zil·
voꝛ dē dv tůſt die hǒbet ſv́nde vnreine·
haſtv des gelǒbē niht dc ſi es kvnnē erkieſē·
dc machet dich an ſeldē lam·
wer ſpꝛichet nv din woꝛt ſi ſint dir alle gram·
lib vn̄ ſele dv dankes wilt v̾lieſen·
klingſoꝛ·
ICh lobe die mēſchelichē art·
vn̄ meine die reinē maget dv́ goteſ mv̊t̾ wart·
nach ſiner art mac ich mich niht gepinē·
danne die er an der ſtvnde nam·
do er dvr vnſ zirme reinē libe kam·
ſeht alſam d̾ ſvnne dvr das glas kan ſchinē·
ſvs kan dv́ reine gotheit zv̊ ſiner mv̊t̾ libe·
bin ich an pfaffen kúnſte ſnel·
ſo ſchein er wider vs ir dvr das ganze vel·
ir was doch we zv̊ helfe manige wibe·
wolfram
Von dúringē h̾re in tvgēnde[WS 11] zil·
voꝛ allē fúrſtē hant dich die beſten vserkoꝛn·
einē krieg ich dankes haltē wil·
den laſſe ane zoꝛn·
ich han die ſt̾ne vb̾leſen·
gar an den ſtremē die zv̊ dē manē durh beſcheidē gânt·
des wil ich aller pfafſen meiſter weſen·
die kvnſt in h̾zē hāt·
zephiras vn̄ aquilan· ir hebē vn̄ ir laſſē
polus vn̄ auſter kvnnēs niht bewarn·
ich wiſſe ir aller endes mal·
ſvnne vn̄ des manē vmbekreis zel ich bi raſtē wol·
ſw̾ úch des bas dāne ich beſcheidē kan·
mit ſanges kv́r·
den ſelbē man
zúch ich voꝛ allen meiſt̾n iemer fúr·
wolfram·
Ein ſtram vō occidēte gat·
allen ſinē oꝛden tůt ú min ſingē ſchier bekant·
der zwelf hǒpt ſt̾ne hat
die die fúrſtē ſint genant·
vn̄ einē kúnig den gezimt·
lieg ich ú vmb ein har ſo bꝛeit heiſſet mich der witze ein kint·
der ſin beſcheiden vō dē manē nimt·
der zeichē núnú ſint·
vmb die wund̾ bꝛandā mv̊ſte pine [224v] vil ervarn·
d̾ edel fúrſte hohgeboꝛn vs menſchlicher[WS 12] art·
vier engel er mit hoꝛnē vant·
der eine der zeiget im vn̄ wiſte in vf die rehtē vart·
clinſoꝛe wilt dvſ· mit ſange wider ſtrebē
deſ mich bevilt·
dir wirt gegeben
dc ich ſwige ſwa dv ſpꝛechen wilt·
wolfram
Clinſoꝛe iſt dir iht bekant·
wie man die zwelf ſt̾nē nennet· vn̄ den ſi hǒptent an·
die w̾dent dir vil ſchiere vō mir genāt·
vn̄ wie der mane kan·
erzeigen kúnftekliche tat·
des himelricheſ froͤide vn̄ der helle h̾zen ſere·
ein ſtram doꝛt her vō oꝛiente gat·
an dē wir michels mere·
der hǒbtſterne vindē vn̄ ir ingeſinde ſchar·
die alle geliche bůchſtabē zv̊ dē manē tragen·
vn̄ einer rede ich mich enbar·
got die koͤꝛe núne hat gemachet dc ichs ſage
wie er darinne mit ſinen engeln var·
der ſchal iſt min·
nv la dc ſin·
klinſoꝛe dv biſt gegē mir v̾ſtv̄met gar·
klingſoꝛ·
Dv geheſt miner ſtvmmē art·
vn̄ wie din kvnſt mit ſchalle ī adelares wiſe var·
ſwer grunt ſv̊chet da nie grvnt enwart·
der kumt vō witzē gar·
vn̄ ſinnet vmb dē núndē koꝛ·
was ſi dar obe vn̄ ob er d̾ gedanke niht v̾birt·
gelǒbet mir dc er vil lihte ein toꝛe
in ſime hirne wirt·
ſolte aber iemā wiſſē vō der mēſchlichē hāt·
ſo wil ich wider krieges dich in kurzē zitē wer·
vō ꝯſtantinopel baſiant·
mv̊ſ gegē dir in kreiſſe ſten· bꝛinge ich dē meiſter her·
zwen vn̄ ſibenzec ſtreme an den himeln ſint·
mit ſt̾nē bꝛeit·
dv wirdeſt ein kint·
ſwēne er die hohē kvnſt dir vs geleit·
klingſoꝛ·
Dv haſt ein ſpil geſetzet an·
wc helfē ſine tage· den niemer affenheit bevilt·
dc mêſchen ſin vol reichē niht enkan·
noh niemer wirt vol ſpilt·
din froͤide mac ſich wol v̾gan·
er iſt gerucket ſo· dc er ſtet ſv̄der hůte bar·
da ritter vn̄ roch gewaltic ſtan·
der nimt ein meiſt̾ war·
zwo clammanie an ſtnē tv̊t din ſingē mir bekāt·
die geliche ich zv̊ den vendē als ich noh beſcheidē wil·
die ſibenzec ſint dir vmbekant·
des han ich ritt̾ vn̄ roch ī miner kúnſte zil·
dc hat zabulones bůch geſeit·
vō babilon·
gar vnv̾zeit·
bꝛing ichſ in der dúringer herrē don·
wolfram
Wer dc ein eit ich hieſſe in mein·
wer gab dir zabýlones bv̊ch· ſage fúrw̾t wiſer man·
dc vigiliuſ vf den agetſteīe
mit groſſen noͤten gewan·
vn̄ wie das bůch getihtet wart
vō einē meiſt̾ der doch lange bette an ein kalp·
er wc ein ivde vō der mv̊ter art·
vn̄ ein heiden vaterhalp·
vn̄ was der aller erſte d̾ ſich aſtronomie ie vnderwant·
dc ich die warheit weis dar vmbe dult ich dinē zoꝛn·
eineſ nahtes er an ſt̾nē vant·
dc bi zwelf hund̾t iarē wurde ein kint geboꝛn·
da vō vs eren alle ivdē wurdē v̾iaget·
dc wc im leit·
die arbeit·
d̾ mv̊t̾ ſin het ers vil ſchiere geſaget·
wolfram
Dú frowe wart in ſchꝛikē rot·
ſi ſpꝛach ſvn dv haſt vō mir d̾ hohſten ivden art·
vn̄ biſt genaturt als der galidꝛot·
ſinú lieben kint bewart·
der vogel wirt niht ſanges lut·
die wil auſt̾ vn̄ boꝛeas ſich hebent vn̄ blêient·
vō im getrútet niem̾ wirt ſin bꝛvt·
ſwēne die winde weient·
als aber die zwene ir vber ſchalles w̾dent in getan·
ir natur iſt zerboͤſten art· dc reht mir volget
als aq̍lon wirt vs v̾lan·
vn̄ mit dē zepfirus dc reine ſvͤſſe wirt die zit·
die vogel tragen vf ir kuchel dan·
mit froͤidē leben
kint ivnger man·
der oꝛdē hat din mv̊ter dir gegeben·
wolfram·
Dv́ frowe do den heidē wis·
des vb̾giēc er ſpꝛach ich wils erwendē ſvnder wan·
es wellē danne die goͤtte ir hohē pꝛis·
an mir v̾derben lan·
min ſin d̾ wirfet es her vn̄ dar·
es iſt ein wūderlich̾ got d̾ die gedanke hat
in aſtronomie trúwe ichs wol ervar·
wies vmb dc wund̾ ſtat·
apollo vn̄ t̾uigant vindenſ niender hap·
nv ſv̊chet mines ſinneſ anker nach deſ grvndes zil·
d̾ erden ſp̋ch vn̄ ſtimme gap·
d̾ tet es wol wan im [225r] deheiner wund̾ iſt zevil·
mv̊t̾ ich wil nach der ivden kúr·
tihten ein bůch·
kvmet es in fúr·
es wirt in gůt fúr diſē argen flůch·
her wolfrā vō Eſchelbach
Nv greif er in aſtronomiē kúr·
nach groſſē zǒber liſten· ſtv̊nt al ſines h̾zen wan·
in nigromantie nam d̾ meiſt̾ fúr·
da ſchꝛeib er wund̾ vō·
nv hoͤꝛet wie er ſichs vnderwant·
vō diſem bůche virgilis nam ſin meiſterſchaft·
eins dezedemoneſ hut er vmbe bant·
dú git dem hirne kraft·
vn̄ ſaf vō lignū aloe· fúr d̾ argē lufte var·
het er in eime golde dvr dē edeln ſvͤſſen ſmac·
dc machet im dú ǒgē klar·
zwelf wochē vn̄ ein iar· er diſer herte pflag·
nv iſt dc bůch bereit gar ſvnder wanc·
der kvnſte wielt·
einē geiſt er twanc·
dc er ims vf dē agtſteine behielt·
klingſoꝛ·
Des meres wag dar vmbe flos·
dvr all̾ ivden ere[WS 13]· gab er vō dē libe dē zol·
d̾ meiſt̾ do ein bilde vs ere gos·
der ſchꝛift es huͤtē ſol·
bin ichs clinſoꝛe vſ vnger lant
ſo hoͤret froͤmde mere· kan úch wūders niht bevil·
einē klupfel trůg es in der hant·
der ſtůnt zeſwerē zil·
der meiſt̾ ſchǒb im einē bꝛief ins hǒbet da ze d̾ naſen·
den klupſel warf es vf zehant·
alſ ich beſcheidē kan·
es v̾riet ein fliege ī eime glas·
dc er v́gillus der meiſt̾ gewā·
wie moͤhte ein fliege in eime glas geweſen·
wer twanc ſi des·
ſwers hat geleſē·
der weis wol es tet ariſtotiles·
wolfram
Er hat úch niht beſcheidē gar·
wie dú fliege wirt gehangē vn̄ dc ſelbe glas·
kleſtronis der mv̊ſtē fvͤrē dar·
der ſin geverte was·
nv wart der meiſt̾ des in ein·
dc er kleſtronē nerē wil voꝛ der helle pin·
in einē rubin twanc ern d̾ iſt ein ſtein·
dc ſelbe vingerlin·
ich ſagt iv wūders mêre wanne d̾ lieder wurde[WS 14] zevil·
vō kleſtrones kvnſte vn̄ vmbe dc ſelbe vingerlin·
ſchachzabels half es ſider ſpiln·
dē edeln kúnig dirol· d̾ trůg es an der hende ſin·
es galt dꝛú kúnigrich vn̄ zwelf lant
dur groſſē zoꝛn·
da engegē benant
was ie ſin hǒbet vn̄ het ers ſpil v̾loꝛn·
klingſoꝛ·
Ich han durh mine kriſteheit·
der edeln meide ſvn v̾lobt· dc ich niemer lvge gezer
zwene geiſte der w̾lde tatē leit·
die wontē vf dem mer·
ich bin ein heiden her geweſen·
alſo wc ariſtotiles d̾ diſe beide bant·
in babýlone han ichs dike geleſē·
wie ſi d̾ meiſter vant·
nv gedenket ſvmlich̾ wurd ers vnderſcheidē niet·
wie moͤhte ein fliege deheinē rât gegebē dvr ein glas·
es was ein geiſt ders bůch v̾riet·
ariſtotileſ der twangē dc er darinne was·
d̾ boͤſe geiſt trůc allem leben haſ·
als er noch tůt·
waſ half in das·
doch zeigte er an dem bilde ſchalkes mv̊t·
klingſoꝛ·
ARiſtotiles was kvnt·
die mere vō dem agtſteine ſvs het ers an geleit·
deſ gewan er beide wurf vn̄ ǒch den punt·
voꝛ aller pfafheit·
ze rome ein rich geſlehte hies·
dc wc in armvͤte komē dvrh ſinen edelen miltē mv̊t·
got getrúwē lib noch nie v̾lies·
ern maches ende gůt·
dú ſelbē vnderſcheidē ſvmelichú ſinú woꝛt·
vil ſchiffe ſtůndē vmbe den ſtein ſagt in der wiſe man·
dar inne manic tvſent hoꝛt
vō golde lege ders mit liſtē moͤhte bꝛingē dan·
deſ ſwůren túre helde an diſe vart·
vil manigē eit·
v́gilus wart gebetten dar der trůg v̾meſſenheit·
wolfram·
Nv kos das ellenchafte her·
falian ze hǒbet man der wc ein grave wert·
der gewan einē kiel do vf dem mer·
reht als ir herze gert·
ein iar er wol geſpiſet wart·
vientlich an zeſehen· vn̄ in kloſterlich̾ w̾·
ſi fůrtē alle harnaſch an die vart·
vn̄ pflagen einer zer·
ſi v̾wagen ſich des tanzeſ mit dē kindē vf dem plan·
ſi fůrtē alle harnaſch vn̄ liehter ſchilte gliz·
ivncfrowen edeln hende wis·
machen in niemer ſchappel als ſi wilent hant getan·
vn̄ einer koſte ſi pflagē· des ſi niht v̾dꝛos·
ſwieſ in ergie
vier ohſen groſ
ſi fůrtē dc doch leider niht v̾nie·
wolfram·
Nv ſihet man ſoꝛgehaftē gaſt·
d̾ doch ī ſinē h̾zen het heldeſ ellē balt·
do ſi geſahen manigē hohē maſt·
als einē walt·
[225v] virgiliuſ hat vns gar ervarn·
deſ ſteines kruft vn̄ dennoch mer· er ſinneklichen wag·
des hoͤhe erwindet da der adelar
niht fúrbas fliegē mag·
vn̄ ander ir vngemvͤte ich ú kv́nde ſvnder mein·
vier ketten die mit fliſſe zv̊ den ohſen warn gewoꝛht·
die ſelbē nimt in nv der ſtein·
ſi fůrn zv̊ zir angeſihte hin vber deſ kieleſ poꝛte·
vn̄ kleibten ſich hin an des velſes want
in hoher luft·
dc mēſchē hant
niht mohte gereichē zv̊ der ſelbē kruft·
wolfram
Nv werdēt ſie in ſelbē gram·
ſie enhelfent liehte wapē noh kein v̾meſſenheit·
der agſtein in do die anker nam·
ſvs wůchs in klagendes leit·
d̾ kiel der gie in ſnellem zil·
dc was nach einem mittē tage gegē der veſꝑzit·
ſýrenē hoꝛt man do ſingē vil·
der ſtimme ſlaffen git·
die ſelbē ſoꝛge ī ſime h̾zen niemā ringe wag·
der ſpiſe was in zerrūnē dc ſi pflagē cleiner zer·
kokodꝛillē wer da ſlafeſ pflac·
dē namēs vſ dem kiel vn̄ trvgen in ins mer·
die grifē namē ǒch ir ſpiſe war·
al da ſi flugē
vō ſneller par·
doꝛt her vō palakerſ da ſi ir ivngē zvgen·
klīgſoꝛ
Vil edeler fúrſte in dúringē lant·
heis din landes h̾ren mit ir wildē merē dagen·
dinr ellen ſi min trúwe· des din pfant·
ich wil die warheit ſagē·
ich enrůche wer dichs berihtet bas·
des wolfram in ſime h̾zen hat lihte mv̊t·
des iſt iemer offen vnſer has·
dc er mir ſtrafen tůt·
palakers hin gegē endia zwelf tuſēt raſte ſtat·
nie vogel trůgē veder dar·
zů alſo verrē zil· da vō er die grifen hat·
es iſt ein wūderliche ſache· als ich úch beſcheiden kan·
palakers hǒbtet hin gegen endian
der hat getwerc
gar ſvnd̾ wan·
von golde wirkēt ſi die ſpehē w̾k·
klingſoꝛ·
Sinnels heiſſet ein getwerg·
palakerſ iſt ſin eigē vn̄ lit bi dē leber mer·
kúnig iſt es vber den ſelbē berg·
getwerge ein michel her·
pfliget er ſo hat der bꝛv̊der ſin·
gebirge in tútſchē landē· vn̄ in der walhē landē·
der ſelbe kúnig d̾ heiſſet laurin·
im iſt vil tugēde bekant·
ſinnels het in dem lande kleiner froͤidē zer·
die wúrme giengē im an den berg· deſ gewan er ſoꝛgen pin·
kokodꝛillē namē im ſin her·
deſ ſant er bottē manigē zů dē kúnig laurin·
dc getwerc im da zwei grifen eier gewan·
die ein ſtruſ beſas·
hoͤꝛt ob ichs kan·
lat úch der mere berihten fúrbas·
klingſoꝛ·
Wie nv der mantel were da·
in cleſtria enfliſia· dc fúnfte bla·
dar vs von fúreſ fvnkeline bꝛande·
vil manig gůt ſtein dꝛinne liget·
die treit ein tier das doch ſin laſt vil ringe wiget·
in clanſion als es dú ſchꝛift mir nande·
Monozrius trůg es vf ſime hǒbt vnder eime hoꝛne·
dar inne iſt ein ſtůndē ſvnnelin·
dc dvr die ganzen mvre bꝛach ir liehter ſchin·
owe wc krone trůc die vſerkoꝛne·
wolfram·
Ich wil die krone bꝛingē fúr·
dú wart gewoꝛht vō ſehtzec tvſent engel kúr·
die woltē got vō himelriche dꝛingē·
lucifer ſich dú was din·
ſwas nv w̾der wiſer meiſter pfaffen ſin·
die wiſſē wol dc ich die warheit ſinge·
ſant michahel ſach gotes zoꝛn in vb̾mvͤte twale·
die krone bꝛach er im ſvnder danc·
vō dē hǒbet dc ein ſtein dar vs geſpꝛang·
der wart ǒch ſit vf erde parcifale·
klīgſoꝛ·
Got tet als er noch dike tv̊t·
vnreht hohvart nimt er die lenge niht fúr gůt·
lucifer mvͤſte vō dē himel vallen·
mit im vil manic engel ſchar·
ir liehter ſchin kert ſich in ſwarze varwe gar·
ir ſvͤſſe dú wart zeiner bitt̾ gallē·
alle dies gedahtē dc ſich lvcifer moͤhte gelichē·
dē ſvͤſſen got zer ſelbē ſtvnt·
die mv̊ſtē vallē in der tiefen helle grūt·
da ſis an ende mit iamer mv̊ſtē richen·
wolfram
Den ſtein d̾ vs der kronē ſpꝛang·
den vant d̾ ie mit hohē pꝛiſ nach wirde rang·
Týturel der dike mit ſiner hende·
die ritter rerte vf der erdē dach·
dē walt man in mit richer týoſte ſwēden ſach·
ſi ſpꝛachē wichet doꝛt kvmt d̾ genende·
es kertē ſchone frowē dar mit liebe ir ǒgē ſvͤſſe·
ſwene er ſich in die pondier [226r] flaht·
vn̄ durh die ganzē ſchare bꝛach mit ſiner maht·
ſo ſpꝛach manig roter mvnt dc dich got gruͤſſe·
klingſoꝛ·
Ich han geflohtē einē ſtrang·
ſwer mir den loͤſet dem wil ichs iemer wiſſen danc·
mit meiſterſchaft wil ich in zv̊ mir ſetzen·
wirt ein vadē vō im v̾ſnittē·
wiſſet dc kvmt niht vō meiſt̾lichē ſittē·
ſo wil ich in an rehtē kv́nſtē letzen·
er ſol mir billich ſiges iehē ob er mirs niht erloͤſet·
ſo wil ich im ſagē mat·
dc es die fúrſtē hoͤꝛent hie an diſer ſtat·
dc min kvnſt ob der ſiner iſt geroͤſet·
wolfram
Den ſig hat got in ſiner hant·
ſwem ers gan dem wirt d̾ meiſterſcheft bekant·
wil er mir helfē ſo fúrhte ich úch kleine·
ich entwiche iv niemer einē fůſ·
ich wil mit rehter kv́nſte ú ſagē mattes bůs·
ia aht ich niht uf úwer dꝛo alleine·
úwern wâg dē wat ich wol d̾ iſt mir noh gar ſihte·
ir grabt danne tiefer úwern grunt·
oder ich tv̊n úch hie voꝛ diſē fúrſtē kvnt·
dc mir úwer ſin iſt gar zelihte·
wolfram
Den tanz kan ich ze rehte ſpehen·
ſwenne got ſpꝛichet blaſet vf ſo iſt es geſchehē·
der don durh aller menſchē oꝛe erklinget·
ſo erſten wir an der ſelbē ſtvnt·
vn̄ kvmē fúr goteſ gerihte d̾ dvr vns wart verwunt·
iegeſlichs ſin ſchvlde an ſihtecliche dar bꝛinget·
ſwēne d̾ tanz ein ende hat zwen reien w̾dēt gefuͤret·
der eine in die ewekeit·
der ander zehelle in iemer