Lǒb gras blv̊men vogel singen

Lǒb gras blv̊men vogel singen·
klage ich vnd den gruͤnen kle·
die der winter wil twingen·
vnd dar zů der kalte sne·
so clage ich ein ander swere·
dc mir dú vil seldebere·
ane schulde tůt so we·

Owe dc dú reine gůte·
mine swere nie bevant·
des ist mir niht wol zemv̊te·
wie ist min dienest so bewant·
dc ich ir niht minen kvmber
klagete ich gǒch ich tôre ich tvmber·
vnd doch twingen mich ir bânt·

Herre got dv gib die sinne·
der vil lieben frowen min·
dc si erkenne ob ich si minne·
herre vnd dur die guͤte din·
dv hilf mir dc si bevinde·
dc ich diente ir ie von kinde·
dur ir minneklichen schin·

Miner frowen minne strike·
hant gebvnden mir den lib·
vnd ir lihten ǒgen blike·
ach genade ein selig wib·
dv hilf mir von minnesorgen·
die min herze hat verborgen·
al die swere min vertrib·

Wil si minen kvmber wenden·
der ich ie dc beste sprach·
trost in sendes herze senden·
von der ich lide vngemach·
si verderbet mich gesvnden·
ach wer heilet mine wunden·
die si dvr min herze brach·

Wesse ich ieman so getrúwe·
dem ich klegete mine nôt·
minv́ leit dú sint niht núwe·
besser were mir der tot·
ê dc ich alsvs verdurbe·
vnd ich anders niht erwurbe·
ê kvst ich ir mvnt so rot·

Reine guͤte tugent vnd ere·
hat si der ich dienen wil·
in gewan nie frowen mêre·
si ist miner ǒgen spil·
swie si mir dc herze twinge·
der ich iemer gerne singe·
so ist si doch dú frowe min·