Meye bis vns willekomē

Meye bis vns willekomē·
ſit dv trurē haſt benomē·
manigē dc den wint̾ her mit ſoꝛgen hat gerungē·
dem walde iſt wol gelvngē·
er ſtet alſo beſvngē·

Dirre mere bin ich fro·
ſpꝛach ein geilú maget do·
wer ſol mir nv wendē ob ich ge nach blv̊mē ſwanze·
het ich d̾ zeinem kranze·
ſo zeme ich an dē tanze·

Tohter la din ſwanzen ſin·
volge nach d̾ lere min·
mich bedvnket dc din mv̊t tobe ſere nach der mīne·
dvn haſt niht gv̊ter ſinne·
da vō belib hie inne·

Nv ſihe ich wol ir hvͤtent min·
ſit ich ſol hie bi iv ſin·
wiſſent doch ſit ich es weis ſo kvmtz ú niht zegv̊te·
v̾loꝛn iſt úwer hůte·
ſo ſpꝛach dv́ wolgemv̊te·

Sol min hůte ſin v̾loꝛn·
deſt mir wol vō ſchulden zoꝛn·
volge mit dvr dine from vn̄ hvͤte dich voꝛ der wiegē·
die man die kvnnē liegē·
da vō la dich niht triegē·

IN hv̊te min voꝛ der wiegē niht·
ſwc halt mir da von beſchiht·
dem ich holdes h̾ze trage dem mv̊s an mir gelingē·
er kan wol ſwere ringē·
ich wil im froͤide bꝛingē·

Dv froͤweſt in vn̄ beſw̾eſt dich·
tohter lâſſe es noch dvrh mich·
nein ich mv̊ter ir hant vch v̾ſv̂met an dem rate·
es iſt nv ze ſpâte·
hin ſpꝛanc dú iv̄ge dꝛâte·