Min h̾ze min lip die wellent ſcheidē

Min h̾ze min lip die wellent ſcheidē·
die mit ein ander waren nv menige zit·
der lip wil gerne vehtē an die heiden·
iedoch dem h̾zen ein wib ſo nahen lit·
voꝛ alder w̾lte dc mvͤt mich iemer ſit·
dc ſi ein and̾ niht volgēt beide·
mir habent dú ǒgen vil getan ze leide·
got eine mvͤſſe ſcheidē noch dē ſtrit·

Sit ich dich h̾ze niht wol mac erwēden·
dvne welleſt mich vil trureclichē lan·
ſo bitte ich got dc er dich gerůche ſenden·
an eine ſtat da man dich wol welle enpfan·
owe wie ſol es armē dir ergan·
wie getoꝛſteſt eine an ſolhe not ernenden·
wer ſol dir dine soꝛge helfē wendē·
mit trúwē als ich han getā·

Ich wande ledic ſin vō ſolher ſw̾e·
do ich dc krúce in gotes eren nam·
es wer ǒch reht dc es alſo were·
wan dc mîn ſtetekeit mir ſin v̾ban·
ich ſolte ſin ze rehte ein lebendic man·
ob es den tvmbē willē ſin v̾bere·
nv ſihe ich wol dc im iſt gar vnmere·
wie es mir ſvle an dem ende ergan·

Niemē darf mir wendē daſ zvnſtete·
ob ich die haſſe die ich da mīnet ê·
ſwie vil ich ſi geflehte oder gebete·
ſo tůt ſi rehte als ſis niht v̾ſte·
mich dvnket rehte wie ir woꝛt geliche ge·
rehte als es der ſvmer vō triere tete·
ich wer ein gǒch ob ich ir tvmpheit hete·
fúr gůt es engeſchiht mir niem̾ me·