Mir ſtolzet vn̄ heret ſin lib h̾ze vn̄ al d̾ mv̊t
[407v]
Mir ſtolzet vn̄ heret ſin lib h̾ze vn̄ al d̾ mv̊t·
ſwēne ich gedēke an dē getrúwē reinē miltē fúrſtē gůt·
d̾ dankes niemer miſſetůt·
heinrich ī peierlant·
ia iſt er gote vn̄ al d̾ w̾lte an tugendē gar gerecht·
ane valſch vn̄ ane wank alſam eī liniere ſleht·
ein ſpiegel clar der tvgende ſeht·
d̾ fúrſte w̾de erkant·
er hat dē gůtē nam̄ vō dem her ſalomō da ſpꝛach·
in weis ob milt̾n fúrſtē ie kein mēſche me geſach·
ſī lob voꝛ maniges fúrſtē lobe ſchallichen lute ergleſtet gar·
als d̾ moꝛgē ſt̾ne voꝛ dē kleinē ſt̾nen var·
Swie liegē ald̾ w̾lte ſi v̾botē in d̾ ê·
doch wil ichs erlǒben dꝛierhande lúte vn̄ niemā me·
den ſelbē tůt ǒch liegē we·
ia bvͤſſent ſi da mitte·
ich wene d̾ arme liegē mv̊ſ d̾ milte ǒch liegē kan·
ſw̾ mīne pfligt d̾ lúget ǒch es ſi dc wib es ſi d̾ man·
die mīnent vō der ê hin dan·
lug iſt d̾ mīne ſitte·
doch weis ich einer hande volk dc lúget ane ſchame·
des ich genēnē niht getar ſo kreſtig iſt ſin nâme·
es ſol dien h̾rē niemā ſagē· dc ſelbe volk dc lúget g̾ne·
wer ich ein fúrſte d̾ mich lobte dē wolde ich heiſen wern·>
Got h̾re âne anegenge got
vn̄ iem̾ got ane ende·
dꝛiualtig vn̄ doch niht wan ein·
in diner magēkraft·
din ſchoͤne ob aller ſchoͤne ſchein·
mit almehtig̾ hende·
vb̾ ellú ding iſt din gebot·
mit voller meiſt̾ſchaft·
dv alleſ heiles vb̾ heil·
vn̄ gv̊t[WS 1] ob aller gvͤte·
din volliv tvgent ane meil·
ob aller tvgēde ie blvͤte[WS 2]·
vntoͤtlich kv́nig d̾ ewekeit·
heilig̾ alpha ⁊ ω·
wis vnſer fride fúr ellú leit·
vn̄ hilf vnſ dc wir iem̾ ſin mit dien gefroͤitē vꝛo·
Sich gotes toht̾ wiltu mich·
niht mietē kúnigīne·
ſo ſage ich wc eī hoh̾ mā·
mit dir begāgen hat·
er nā ſich dir zedienē an·
ī mīnelich̾ mīne·
er warb es tǒgē wid̾ dich·
do tet dv ſwes er bat·
dir gieng ſin bet vn̄ ſinú woꝛt·
durh oꝛē vn̄ dvrh ǒgē·
al dar kam ſiner froͤidē hoꝛt·
zedir geſlichē tǒgē·
er wc dir mīneklichē bi·
mit warheit ſvnd̾[WS 3] ſpot·
doh weis ich din̾ hulde dꝛi·
d̾ dv v̾holne pflege vn̄ wc des gabꝛiel din bot·
Merke hoh vn̄ adel man·
w̾ dir an dinē rate·
wol vmb alle din ere zeme·
da mā dir ratē ſol·
zerehte ſoltu volgē deme·
d̾ ſich fruͤie vn̄ ſpate·
voꝛ ſchāden ſelbe vꝛien kan·
dē zimt zerate wol·
d̾ vf an gv̊tē dingē nimt·
vn̄ mīnet got vn̄ ere·
d̾ ſelbe wol zerate zimt·
vn̄ and̾ keine m̾e·
wie ſol d̾ ratē erē rat·
d̾ erē niht enpfliget·
vn̄ doch niht got voꝛ ǒgē hat·
deſ rat den ſv́ndē noh den ſchandē niem̾ an geſiget·
Swa ſo d̾ hohe edel mā·
gemachet vn̄ enrůchet·
an dē bêſiget hoher mv̊t·
er welhēt vꝛeche tat·
in flúhet ere vn̄ ſwindet gv̊t·
ſin volk die froͤmdē ſv̊chet·
ſo hie ſo doꝛt ſwas vindē kan·
dc wirde vn̄ ere hat·
klim ih die hoͤhe hohú fruht·
ir helſent helde erſtigē·
wis mālich milte mīne zvht·
ſo mv̊s dir hohvart nigē·
liht ſenfte wening nv v̾uat·
gegē freheit ſv̄der zoꝛn·
wol merke wie dú welt nv ſtât·
biſt dv niht mālich vn̄ vꝛech ſoſt ere vn̄ gv̊t v̾loꝛn·
Mich wūdert wie dē h̾ren ſi·
der ſich bi richer gúlte
beſcheltē vn̄ in flv̊chē lat·
vn̄ dc ſin dineſt man·
voꝛ im ſo wol gelobt̾ ſtat·
ob mā in g̾ne ſchúlte·
ſo iſt er ſchādē alſe vꝛi·
dc in niemā enkan·
beſcheltē noh dē h̾ren niht
gelobē mit lobe biwerē·
er mv̊s ſich ſchamē ſo mā in ſiht·
gvnmīnet vn̄ vnm̾en·
benamē da mv̊s betruͤbet ſin
des bid̾ben mānes mv̊t·
ſich wandelt ſiner varwe ſchin·
vn̄ mv̊s ſich ſines h̾zen ſchamē ſoꝛ lafterlichē tůt·
Ahy wie w̾deklichē ſtat·
d̾ hof in peig̾lande·
en kein̾ me ſo w̾deklich·
in al der kriſtenheit·
da wont dú keiſerīne rich·
in erē ſvnd̾ ſchande·
dv́ kúnigin vō rome hat·
da ganze w̾dekeit·
des kv́niges kint vs vngerlant·
in wirdē lobeliche·
dú h̾zogīne vō bꝛabant·
dar zv̊ dú fúrſtin riche·
zwo megde die ir toht̾ ſint
da bi ir vnd̾tan·
vil edel frowē maget ir kint·
dā noch ſo lat mā ſw̾ d̾ wil zv̊ deſ fúrſtē bꝛote gan·
Swer giht die gv̊t den v̾endē gebē·
[408r] die moͤhtēs alſem̾e·
dē tieuel ſtozē in den mv̄t·
der lúget nides vas·
vntrúwe vnfůre vnrehtes lebē·
ſi haſſēt offenb̾e·
die wiſen g̾ndē daſt mir kvnt·
an got ſo zúge ich das·
ſi gebēt dur got des mā in git·
vn̄ wúnſchent ane lǒgē·
dien gebēdē heiles zaller zit·
ſi habēt got voꝛ ǒgen·
ſi enphahēt got des lichamē·
vn̄ habent zekriſte pfliht·
ǒch kv̄nen ſi ſich ſv́ndē ſchamē·
vn̄ bittent vmb die criſtēheit[WS 4] des tůt keī túuel niht·
Swer giht d̾ gv̊t dvr ere neme·
dc ſich der ſere ſv́nde·
nein al die dir lebendig ſint·
die nemēt durh ere gv̊t·
wie ſint ſi lugener ſo blint·
des ſi got min vrkúnde·
ob es iemē miſſezeme·
zenemēne es entůt·
wā d̾ ſin zevil genimt·
dc iſt ſv́nde vn̄ ſchande·
zerehte als es d̾ diet gezimt·
zehimel vf wâge vf lande·
ſw̾ nimt zevil nv wiſſent dc·
dc iſt d̾ ſele ein ſlag·
es tv̊t ǒch niht wā gûtes vas·
die niemā vf d̾ erde hie mit gv̊te erfúllē mag·
Swer giht der gůt dvr ere gebe·
dc ſich der ſv́nde ſere·
d̾ lúget ald̾ es ſv́ndet d̾·
der all̾ meiſt da git·
dē kriſtē iudē ſo git er
den heidē m̾kent mêre·
dē ketzer ǒch ſwie ſchade er lebe·
gůt vn̄ guͤtú zit·
fúnf ſinne ſelde ſele vn̄ lib·
git er vns froͤide an kindē·
rihtům wiſheit vn̄ liebú wib·
ſvs gebende lat er ſich vindē·
ſwc lebendic iſt dc hat vúr war·
vō ſiner gabe dc lebē·
er git dc himelriche gar·
der rehtē diet dvrh ere ſin ſvs kan er rilich gebē·