Mir hat ein wib (Mit originalen Lettern)

Mir hat ein wib·
herze vn̄ lib·
betwungen vn̄ gar verhert· |
dú iſt ſo gv̊t·
ſwas ſi mir tv̊t·
wil ſi ſo wirde ich ſanfte ernert· |
tv̊t ſi mir we·
doch wil ich ê·
betwungē ſin von ir gewalt· |
danne ich verber·
die werden ger·
vn̄ ouch die ſoꝛge manicvalt· |
die ſi mir machet·
vn̄ git· |
min froͤide ſwachet·
iemer ſit· |
ſwenne ſi nv lachet·
zaller zit·
des ſelde wachet·
ſvnder ſtrit·
gelúkes rat·
hat in den pfat·
geleret ſo·
das er ſol ho·
dar vffe ſweben·
mit froͤidē leben·

Solde ich das ſin·
ſo mvͤſte an aller ſoꝛgen ſchin·
das herze min·
erhoͤhet werden ſvnder pin·
ich froͤide bar·
ich gedenke ie dar·
als ich getar·
wirt ſi gewar·
das ich ſo var·
ir eigen gar·
ſi erzeiget ir·
genade an mir·
ſi iſt ein wib·
der ie min lib·
alleiner lebt·
vn̄ iemer ſtrebt·
vf den gedinge·
vn̄ ſelchē troſt·
das mir gelinge·
vn̄ werde erloſt·
der ſoꝛgē dú mich twanc noh ie·
ſit ich verlie·
dē mv̊t an ſie·
Min herze iach ·
ſit ſi min ǒge alrerſt er ſach·
ſin vngemach·
das ime ſit·
bi ſiner zit·
beſchach·
das were da hin·
vn̄ were ime ſin·
komen vn̄ gewin·
des wande ǒch ich ·
nv tv̊t ſi mich·
gar ſoꝛgen rich·
vn̄ meret mine clage·
das verkeret·
vn̄ ſeret·
mine tage·
min gemv̊te·
iſt woꝛden kranc·
ich verwͤte
nah ir gvͤte·
ane allen danc·
Je doch dar vnder·
iſt ein wunder·
niht beſvnder·
das ich liden·
vn̄ miden·
mv̊s ſi reine·
die ich meine·
niht ze cleine·
amme herzen·
hab ich ſmerzen·
vn̄ kūber·
ich vil tvmber·
manigen ſvmber·
warzv̊ wart ich ie geboꝛn·
ſol ich iemer ſin verloꝛn·
ia hat ich ſi mir erkoꝛn·
das die wunden·
vngeſvnden·
mir verbunden·
ſolten werden·
von der werden·
nv iſt min ſwere·
ir gar vnmere·
der ich lere·
wurde ob mir dú frowe min·
tete gv̊ten willen ſchin·
ſolde es mit ir hvlden ſin·
das ich ſpꝛechen·
mvͤſte zir·
was ſi zechen·
vn̄ rechen·
wolde an mir·
ſicherliche ob das geſchiht·
imme riche·
iſt min geliche·
danne niht·
herze ſinne·
minen mv̊t·
hat dú minne·
mit gewinne·
alſo behv̊t·
Peir der mere·
dulde ſwere·
dvr afriên·
ſin amîen·
Von navar·
Mei von lône·
lie die krone·
vn̄ die ſinne·
durch die minne·
drîſſeg iar·
er was ſoꝛgen rich·
dc was kvmberlich·
doch vngelich·
der ſwere min·
die mir tv̊t ſchin·
von der ich dulde diſen pin·
Es en ſtille·
ir gv̊ter wille·
in kvrzen ziten·
ane biten·
ich bin tot·
Sol min trúwe·
ane alle rúwe·
ſus ein ſterben·
an ir erwerben·
deſt ein not·
die ich gerne dol·
vn̄ liden ſol·
ſo rehte wol·
ſtet ſi mir an·
ich ſelic man·
ſo ſuͤſſe not ich nie gewan·
Je doh ſwie gerne·
ich ſterben lerne·
dvr ir minneclichen lip·
owe ſi reine ſelig wib·
ſo denke ich doch·
das ſi mir noch·
gerůche geben·
ein ſenfter leben·
des valde ich ir die hende min·
das ane ir zúrnen mv̊ſſe ſin·
ob ich genende·
vn̄ ich ir ſende·
diſen ſanc·
ir lob ir ere·
ich gerne mêre·
in froͤmdú lant·
tv̊n ichs erkant·
mit trúwen ane valſchen wanc·
wirt mir da von ein habedanc·
ich ſinge ir das·
ir lob noh bas·
erhoͤhet ob ichs ê· vergas·
Mine frowen·
ſvlt ir ſchowen·
in ſo hoher w̾dekeit·
das ir ſol iemer ſin gereit·
der erē krone·
ſit vil ſchone·
eht aller ſelden ſeldekeit·
ir beide hende hat geleit·
ir vf ir hǒbet·
dc gelǒbet·
alle mir·
ob ir ſi ſeht·
ir verieht·
tvgende michels me von ir·
danne ich iv ſage·
wand ich durch klage·
mines willen vil verbir·
min frowe iſt gv̊t·
ie doch ſi tůt·
das wunneclichen froͤiden gir·
Mich vergat·
vn̄ lat·
das mir kvmberlichen ſtat·
wand ich pflac·
manigen dag·
das min froͤide nie gelac·
owe der dinge·
ich wenne ich ringe·
vf einen wan·
den ich han·
dem ich iemer vndertan·
weſen mv̊s·
deſt mir bůs·
niemer wirdet vntz ein grůs·
mich enbindet·
ſa verſwīdet·
vn̄ erwindet·
Alles klagen·
in minen tagen·
was ſol ich von froͤiden ſagen·
ſol ich heil an ir beiagen·
ſwie das were·
es were zit·
alle ſwere·
ich gar verbere·
ob ſi den ſtrit·
genedecliche·
wolde ir geben·
endeliche·
ê ich danne entwiche·
ich ir gibe das leben·
bi dem eide·
ich wil geloben·
ſin enſcheide·
mih von leide·
ich mv̊s ertoben·
das erwende
ſelig wib·
vn̄ ſende·
mir das ende·
das min lib·
froͤide vn̄ minne·
vn̄ ſinne·
von dir kúniginne·
gewinne·
dar nach ich iemer ringe·
vn̄ zallen ziten ſtrebe·
vf das hoh gedinge·
ich vil dike ſchone lebe·
das mir an dir gelinge·
vn̄ enphahen mvͤſſe·
ſvͤſſer minne gebe·
wie ſvͤſſe ich danne ſinge·
vn̄ erclinge·
ſwenne ich froͤliche ob allen froͤiden ſwebe·