Mir ist vil we was ich gesage

Mir ist vil we was ich gesage·
dc sich dú gůte niht bedenket noh·
dc ich so langen kvmber trage·
nah ir ich weis wol· das ich lide doh·
alles dc ich vmb ir hulde liden sol· ich diene ir·
swie so si gebútet mir·
wer ich so selig so si sagent·
ich geschant an ir die mich da iagent·
vs lieb in leit vnd min not mit valschen meren klagent·

Des ich nú lange han gegert·
wirt das volendet so ist mir froͤide braht·
vil manigen tag dv́ht ich sis wert·
si hete lones wider mih gedaht·
nieman weis ob si mich wert oder wies ergat· nein oder ia·
ich enweis enweders da·
warvmbe rede ich solichen nit·
si endaht an mich ze keiner zit·
wan als ein wib gedenket an der trúwe vnd ere lit·

Spreche ein wib la sende not·
so svnge ich als ein man der froͤide hat·
svs mv̊s ich truren an den tot·
sit ir min langes leit niht nahe gat·
do ich gesang dc ich gesvnge niemer liet· in minen tagen·
owe so langes klagen·
ich wenne es ǒch also ste·
mir tůt dú sorge niht so we·
als min vngevelle dester schade in weis niht me·