Mir ist von liebe vil leide geschehen

Mir ist von liebe vil leide geschehen·
lies ichs darvmbe so were ich zekranc·
dur dc sende ich disú lieder dur spehen·
an eine stat dar mich dc herze twanc·
sit ich ir leider niht wol mac gesehen·
so sol si merken dur got minen sanc·
wil mir dú schoͤne der warheit iehen·
so was si es nach der min herze ranc·
vnd iemer mv̊s doch mir nie gelanc·

Mich hat dc herze vnd ein vnwiser rat·
ze verre verleitet an tvmplichen mv̊t·
da doch min dienst vil kleine veruat·
der kvmber hat mich vil dike gemvͤt·
minne vil suͤsse beginnunge hat·
vnd dvnket an dem anevange gv̊t·
da doch dc ende vil rúwic gestat·
als es mir armem vil lihte getůt·
wie solt ich von der not mich haben behvot·

Si darf des niht gedenken dc ich minen mv̊t·
iemer bekere an dehein ander wib·
des selben han ich mich her wol behůt·
sit ich ir gab beidiv herze vnd lib·
vf ir genade swie we es mir tůt·
doch wil ich noch langer haben den strit·
ich hoffe^{[WS 1]} des dc min reht iht si so gůt·
dc si mir schiere ein vil liebes ende git·
der grossen swere so si des nv dvnket zit·

Anmerkungen (Wikisource)

1. Vorlage: offe.