Mir stet trǔbe von ir zesine

Mir stet trǔbe von ir zesine·
noch danne lide ich bi ir pine·
dc tůt rehter minne kraht·

Menig creatúre ist plide·
dv́ bis her in sorgen was·
dast naturlich gegen dem zide·
doch helt mich minne in ein pas·
si tv̊t mir dc ich verswine·
genade kúsche werde fine
vmb úch pense ich tag vnd naht·
Mir stet trǔbe von ir zesine·
noch dan ne lide ich bi ir pine·
dc tůt rehter minne kraht·

Maniger helt von minnen tâle·
den noch niht twang der minne bant·
ich wolde dc mans kande wal·
so wurde gůte minne niht geschant·
es ist clerig leie noch begine·
si ǒge sich vssen liep zesine·
des doch ins herze niht enaht·
Mir stet trǔbe von ir zesine·
noch dan ne lide ich bi ir pine·
dc tůt rehter minne kraht·

Het ich die kvr von allen frowen·
son wandelt doch niht dc herze min·
so sere minne ich eine mit trowen·
dc ich ir vndertan mv̊s sin·
entzwischen mâse vnd dem rine·
ist kein schoner danne dú mine·
si lit vast in miner gedaht·
Mir stet trǔbe von ir zesine·
noch dan ne lide ich bi ir pine·
dc tůt rehter minne kraht·