Naturen kraft erſchinet

Naturen kraft er ſchinet
an dem vogel vellica
kein ſwere noch kein pine noch kein leit enkvmete da·
alſo das er icht lide not·
wan er die krone ob alſen foͤgellin treit·
d̾ tot in nicht enpinet·
alſus dv́ ſchriſt ſeit offenbar·
ſin lip voꝛ tode iſt froͤmde· ſin vederā werdent blv̊tig var·
ſo das dv́ gotheit nie wart tot·
dv́ menſcheit ſtarb· ein criſt dvrch v́ns er leit·
dv́ gotheit menſcheit fůrte·
dv́ menſcheit ſtarb ſo das der tot· die gotheit nie berůrte·
das was ein michel wunder·
das vatt̾ ſvn geiſt was ein ſtrik·
vn̄ doch nit einr leije· iamers pik·
die tǒgen entſloſ die valſcheit nie dar vnder·

Got iſt ein ewig iēmer
ein ſpiegel ſpꝛiſſel hat gebelt·
mit der geiſtheit gewidemt· in ange vierde ſtat dv́ welt
da ſchinnet liecht in himel zvnft·
mir ebener mâſſe· in voller ſvͤſſekeit·
din ewiklich gezimmer·
din zvcker ſvͤs bꝛach den ſwadem·
mit der geiſtheit erbidemt· dvr drilich was der goͤtlich adem·
dꝛúleſtik vunk mit rilich kvnſt^{[WS 1]}
enzv́ndet wart dv́ bꝛvnſt· die got beſneit
din vatterlichv́ helſv́·
in ewikeit die bꝛuchche twang· mit d̾ naturen gelfe·
bꝛach er in applatys
vn̄ nā des lambes vanen rot·
der werden bꝛuſtlin oſter bꝛot·
mit innekeit hilf magt vns zv̊ der ſpiſe·

Der gottes tempel here·
d̾ in ſin geiſt gewidmet was·
d̾ ſt alſo gezieret· da hat dv́ ware minne flaf
enzv́ndet daſ ſi git ſolchen ſchin·
dv́ ſv́ne clar· mv̊s da bi vinſter weſen·
d̾ tempel was nach lêre·
vf einem ſarch vil ſchon erhaben·
der ſarch was rot marmel· d̾ tempel guldin wol dvr grabē·
da mitten vf des ſarches ſchrin·
ein coꝛpoꝛal alſ man vns hat geleſen·
gefv̊g zv̊ dꝛi ualten
dar in ſo lit das lebent bꝛot· menſchlich in dꝛú geſpalten·
alſ vf dem tempel ſtúnde·
ich ſich wol lambes blv̊te rot·
dvr ſine hulde leit er den tot·
got ſvn er waſ· vn̄ ſtarb·
vri aller ſv́nde·

Anmerkungen (Wikisource)

1. Vorlage: rilichvnſt nach Pfaff gebessert zu rih̾chvnſt.