Nv ſiht man die heide bꝛeit

Nv ſiht man die heide bꝛeit·
wol beſchoͤnet· mit den liehten blv̊men manigvalt·
meige hat ſich zin gekleit·
wol bedoͤnet· mit den vogelin ſtet der grvͤne walt·
in den ǒwen· mag man ſchǒwen· roſen rot·
ach dvr got ſo lide ich aber ſeneliche not·


Jch ſach einen roten mvnt·
lieplich lachē· gegen mir ſenden des iſt niht zelang·
da von wart mir froͤide kvnt·
truren ſwachen· kan ſi do das in min herze dꝛang·
ich mv̊ſ ſingen· des wil twingen· mich ein wib·
vn̄ der kv́nig dar zv̊ ir trůtelehter loſer lip·

Owe roͤſelehter grv̊s·
wie dv lacheſt· ſo dv herze liebe lachen wilt·
da wirt ſender ſoꝛgen bv̊ſ·
ſo dv macheſt· dc dú liebe gegen der liebe ſpilt·
nah gewinne· da iſt eht minne· nahe bi·
vn̄ machet zwei geliebe herzen ſwere fri·

Herzen trut min kv́nigin·
lat erwinden· gegen mir noch den ſenelichē ſtrit·
ſit ich úwer eigen bin·
froͤide vinden· wolt ich frǒwe dc were an der zit·
vmbevahē· lieplich nahen· dc tv̊t wol·
vn̄ naher baſ ob ichs mit hvlden ſpꝛechen ſol·

Swas ich her geſvngen han·
dc veruahet· mich vil kleine daſt mis herzen klage·
da von mv̊s ich ſingen lan·
ſi verſmahet· das min herze ſi in liebe trage·
ia ſi denket· dc mich krenket vil der tage·
das ich ir niht gedienen mv́ge das iſt mis herzē klage·