Nv iſt ſumer ſo wol gegeſt das er ere hat

Nv iſt ſumer ſo wol gegeſt das er ere hat·
in ſchoͤner wat·
mag man in nu wol ſehen·
rot bꝛun gel bla wis gruͤne iſt ſin kleit var·
ſw̾ ſin nimt war·
der mag im wunne iehen·
in lobent mit ſuͤſſem ſange dú vogillin·
dú ſehēt ſo lichten ſchin·
mit dien ſol man froͤlich ſin·
ſwie ſchoͤn dú zit ſīt truͤbe iſt mir doch min můt·
wan mich getroſte noch nie min frowe gůt·

Es iſt lang das ich min frowen vō erſt giſach·
min vngemach·
hůb ſich do ſuͤſſekliche·
wan ich wart vō ir wunnen^{[WS 1]} ſuͤſſes liebes vol·
mir tet da wol·
das ſi was wūnenriche·
nu můs mir das leider we tuͤn ellú zit·
wan ſi mir nicht troſtes git·
des min herze in arbeit lit·
wan w̾e ſi âne wunne ſo w̾e mir nit we·
nach ir als es ſus ſin můs iem̾ me·

Noch iſt mir wol d̾ ſtunde ſwa ich ſi ſiche an·
ſwies mir iſt gran·
doch habe ich ſi zefrowen·
doch wirt das lieb v̾gulten mir mit leide ieſa·
ſo ſi nicht da
mer iſt da ichs muge ſchowē·
ſo iſt mir als ſo der ſunne hind̾ gegat·
vn̄ d̾ tag ſin wūne v̾lat·
froͤiden vil ſi doch ie hat·
bi and̾n ſchonen frowen noch achtet nicht·
ſwie we mir vō ſenlich̾ not giſchicht·

Anmerkungen (Wikisource)

1. Vorlage: wūnnen.