Nv ist der svmer von hinnen gescheiden

Ich wil gruͤnen mit der sat·
<poem>Nv ist der svmer von hinnen gescheiden·
wan liht siht den^{[WS 1]} walt engesten·
lǒb von den esten·
riset vf die heiden·
dien leiden· rifen bin ich gram·
vnd der winter zit alsam·
Sumer svmer suͤsse·
schon ich geleben muͤsse·
das ich manig vogelin gruͤsse·

Der ich han da her gesvngen·
dú ist ein klůge dienerinne·
nah ir minne·
han ich vil gerungen·
gelvngen· ist mir niht an ir·
wan si wolte gůt von mir·
Sumer sumer suͤsse·
als rich ich werden mvͤsse·
das ich beschvͤhe ir fuͤsse·

So wer min singen gar wol behalten·
dar zv̊ neme mich dú klůge·
dú nah dem pflůge·
mv̊s so dike erkalten·
schalten· den wagen so er gestat·
des meiers hof si gar begat·
Sumer sumer suͤsse·
v́r winter ich dich gruͤsse·
ich schuͤhe ir niht der fuͤsse^{[WS 2]}·

Anmerkungen (Wikisource)

1. Vorlage: ſihtdē.
2. Vorlage: ſuͤſſe.