Nv klage ich der kleinen vogellin ſwere

Nv klage ich der kleinen vogellin ſwere·
nv clage ich dv́ heide iſt blv̊mē lere·
ſo klage ich dc mir dv́ wnnekliche ſeldebere·
hat berǒbet mich der froͤiden ſinne·
ſich da biſt dv ſchvldig an trvt minne·
ſit dv weiſt dc ich ſo gar in diner glvͤte bꝛinne·
dc mag mir din truͤteleht̾ lip mit liebe bvͤſſen·
vn̄ ir roter mvnt der ſol mich grvͤſſen·
tv̊nt dv́ zwei deſ niht ſo klage ichs doch der reinen ſvͤſſen·

Si mag mir wol minen kvmber wenden·
vn̄ ir mīnekliche helfe ſenden·
owe minne wenne wilt dv troͤſten mich vil ſenden·
wenne wilt dv mir min truren ſwachen·
wenne wiltv ſvͤſſe fruͤde machē·
alſo dc ir roter mvnt mir lieplich wolde lachē·
truͤtelehter lip dv la mich liebe froͤide vinden·
dv maht mich von ſender not enbinden·
wilt dv h̾zen trut ſo mag mir ſendes leit verſwinden·

Nv was hilfet ſwas ich clage der herē·
ſin wil mir enheine froͤide meren·
ſvͤſſe minne maht dv doh die minneklichen leren·
dc ſi fvͤge das mir leit entwiche·
ſich ſo wirde ich noh an froͤiden riche·
tv̊t ſi dc ſo wirde ich fro dv́ ſvͤſſe minnekliche·
alſo dc mir wrde ein grv̊s von ir vil rotem mvnde·
vn̄ ir kvs mis h̾zen not enbvnde·
do ich ſi von erſt an ſach dc was ein ſvͤſſú ſtvnde·