Nv lange stat dú heide val

Nv lange stat dú heide val·
si hat der sne·
gemachet blv̊men eine·
die vogel trurent vberal·
das tv̊t ir we·
der ich es gerne scheine·
min lib ie vor den boͤsen hal·
dc ich si me·
mit rehten trúwen meine·
danne ieman vinden kvnde zal·
hete ich vo allem heile wunsches wal·
vber ellú wib verleitet mich abe dirre stete dekeine·

Si vindet mich nv lange zit·
an der gir·
dú ist eht iemer stête·
nah rehte liesse ich minen strit·
wer dc si mir
lônes genade tête·
nv machet velscher werlte nît·
dc ich verbir·
gedinge der wirt ze spete·
davon min herze swere lit·
betwungen was es iemer sit·
noh wurd es frô leiste dú schone des ich si bete·

Mir were starkes herzen not·
ich han so vil·
der kvmeberlichen swere·
noch sanfter tete mir der tot·
danne ich es hil·
dc ich alsvs gevangen were·
ich leiste ie swas si mir gebot·
vnd iemer wil·
wie vngerne ich das verbere·
dú zit hat sich verwandelot·
der svmer bringet blv̊men rôt·
min wurde rât wolte si mir kúnden liebiv mêre·

Solt ich an froͤiden nv verzagen·
dc were ein sin·
der mir niht wol enkême·
ich mvͤse vnstetes herze iagen·
als ich enbin·
der mich da von benême·
der mvͤse zǒberliste tragen·
wan solh gewin·
sich hvͤbe der mir niht zême·
sin langes frenden mv̊s ich klagen·
dv solt im lieber botte sagen·
wie gerne ich in sehe vnd sine froͤiden vernenme·