Nv lat úch númme wunder haben ir man vnd ǒch ir frowen

Nv lat úch númme wunder haben ir man vnd ǒch ir frowen·
dc got sine mv̊ter sach ê er ie moͤnsche wart·
er danne ie himelwart gewurket· ir got lies erden schǒwen·
do swebt der heilig geist vf minnen se vnd hielt vil zarte·
barmvnge die in selber hat betwungen·
die leit er an die mv̊ter sin· ob ich han war gesvngen·
dc wil ich an die werden wisen meister pfaffen lan·
vnd an des kúniges týrols bv̊ch dc saget vns svnder wan·

Ich wil úch von siben kronen sagen die trůg ein froweren bilde·
dc wc bi den ziten do got sinú wunder mas·
wie die vrowen sin genant dast manigem toren wilde·
wan des kúniges týrol bůch hat mich berihtet bc·
wie wir die reinen frowen svln nennen·
er selig man si keiserin· der si kan halb erkennen·
der mag wol gotes hulde haben vnd hie der werlte gvnst·
nv vrage fúr bas tvmber man ich sage dirs hab ich kvnst·

IR hohen pfaffen swa ir sit ir meister prediere·
ir werden leigen vrowen nemt min singen niht verhas·
von einem bv̊ch wie kvnd ich vns dú hohgelopten mere·
wie got selber zeiner zit· in siner tǒgen sas·
er dahte zwar ein ding dc mv̊s geschehen·
dv wilt barmvnge vnd ǒch dc reht in eren bilde sehen·
trúwe vnd ere die zwo frowen ǒch nach irm sitte
scham vnd milte zuht dú reine klare gienc da mitte·

Solt ich úch von der zierde sagen wie die frowen weren·
gekroͤnt vnd gekleit ir spehe wurde vil·
swie ichs von daniel dem wissagen geweren·
habe vnd ǒch von des kv́niges týrols bv̊ch es were leigen alzevil·
hier vmb wil ich vragen reine wise lúte·
wie ich die gotes tǒgen der werlte gar betúte·
welhe frowen da got hielt vúr al sin wunder zart·
barmvnge die gab er menscheit dú sit sin mv̊ter wart·