Nv wil der sumer hinnen

Nv wil der sumer hinnen·
owe dast mir leit·
man sach in sinem grase dike schone frowen gan·
der winter bringit vns innen·
grôsser trurikeit·
vnd ǒch dike kleine vogel wilde das sir sang wen lan·
da bi ist er ǒch bi senden sorgen schade·
si weren an in doch vil zeswere·
ich můs iemer ligin vnder glúkes rade·
mirn helfe vf min frowe seldebere·
si ist gar wandels lere·
dauon bin ich ir·
owe wenne sol von ir genaden komen ir trost zemir·

Wer moͤchte mir gelǒben·
wie mir senden ist·
swenne ich si sihe so schon gebaren vnd so wol gestalt·
ir wunne macht mich tǒben·
das mir sinne brist·
vnd brinne ǒch in der minne vúre wilent wirde ich kalt·
also wandel ich mich da von rechter not·
wan mich iamert nach ir alse harte·
ir wengel vn ir munt sint so rosen rot·
da bi lachet si so rechte zarte·
si ist ǒch rechter arte·
ach wie ist si so gůt·
got hat ir truten stolzen lib vor arge gar behůt·

Enkein ding mag so gůt sin·
man vindet wol daran·
das man spreche en wer das so were es volkomen gar·
wan dú schone frowe min·
dú ist wandels erlan·
si ist kúsch mit worten vnd mit werken so ist si valsches bar·
est nit můtwille das mir nach ir ist so we·
mich erlat sin nicht dú starke minne·
ir kel vnd ir hende sint wis recht als der sne·
vnd stet so lieblich ir ir kinne·
uil wol stet ǒch ir tinne·
vnd ir ǒgen clar·
als ich si han gelobt· dc ist ane allen zwivel war·