Nv wol vf reigen vúr den walt

Nv wol vf reigen vúr den walt·
an eine wise lange·
da die blv̊men wunnekliche dur dc gras·
sint gedrungen manigvalt·
da horte man von gesange·
michel wunder was der vogelline wc·
der iegesliches sine stimme svnders sang·
lute erklank·
svͤsser schal·
den hv̊b dú liebe nahtegal·

Nv wol vf kinder gen wir dar·
tanzen vnd reigen·
da die blv̊men wunnekliche stênt· geblůt·
dú heide ist wunnekliche var·
si hat sich gegen den meigen·
gezieret in ir besten wat dú ist so gv̊t·
die vogel alle sint der svmer wunne fro·
rehte also·
tete ǒch ich·
vnd liesse ein ander swere mich·

Nieman sehe an minú leit·
swelh eigen nôt mich twinge·
miner sorgen wirt wol rat so dc sol sin·
gen wir zv̊ der linden breit·
da manig vogel singe·
hoͤra liebú isentrut sprach lvͤtelin·
ich wêne dv́ svmer wunne ist komen in dú lant·
min gewant
solt ich han·
wan ich mv̊s zv̊ dem reigen gan·

Vor zorne do dú mv̊ter sprach·
der tiefel walt ir beider·
des reigen vnd der sin bi erst ie gewůg·
tohter habe din gemach·
dun hast niht diner kleider·
si sint noch da^{[WS 1]} si din vatter húre trůg·
do wir flohten da von habe din gemach·
zornig sprach·
do dc kint·
ich weis wol wa dú kleider sint·

Nv la si swa si wellen sin·
si enkoment disen meigen·
niemer an dich dar nach wende dinen mv̊t·
io herre got wc wart eht min·
io enkam ich nie ze reigen·
es wc hie vor vnbillich dc nv megde tůnt·
dc si zeholze liefen reigen sam die knaben·
dv solt haben
din gemach·
ze reigen man mich nie gesach·

Nieman vnser ding vns hie·
so gar zeboͤstem keret·
so die tv̊nt die aller meist hant vbertretten·
vil manigú kan zereigen nie·
div doch wol wart geleret·
das si da heime leiste vnd wart si ihtz gebetten·
lachet ieman vor dem reigen der ist verlorn·
wirt mir zorn·
so rede ich
dc dar nach gerúwet mich·

Nv wis mit froͤiden liebes kint·
wie wening ich dc hâsse·
lǒf an die strasse zv̊ den kinden wirf den bal·
weistu wa diniv kleider sint·
si ligent in den vasse·
grif in die kistun bi dem stollen hin zetal·
lege einen borten vf das hǒbet vúr den kranz·
dinen swanz
lege an dich·
das war so bist dv svberlich·

Wiste engeldrut vnd irmelin·
dc wir vf die heide·
nach blv̊men wolten gan si liefen mit vns dar·
ia sagte ichs ir sprach gvͤtelin·
si iahen nehtint beide·
wir solden disen svm sin in einer schar·
ella bela hiltrut vnd gvͤtelin·
zǒge din
nim si dan·
die wile lege ǒch ich mich an·

Mit flisse wart dc kint bereit·
in sinem swanz gevalden·
darvmbe ein borte wol geslage vnd smal·
si giengen vf die heide breit·
gelúke mvͤze ir walden·
metze vnd ella nieman kvnde ir wissen zal·
do si vf die heide kamen froͤide grôs·
luter dos·
do er schal·
den anger alles hin zetal·

Si haten mengen spiegel gůt·
gestriket zeiner rise·
dc solde do ir meie sin darvnder sang·
vs rotem mvnde alsam ein blůt·
ein maget in svͤsser wise·
wol gestriket liehte varwen siten lank·
dú sang vor die andern svngen alle nach·
in wc gach
fúr den walt·
da hv̊b sich reigen manicvalt·

Vor dem walde in eime tal·
da sach man swenze bliken·
da si zemen kamen vnd mangen kranz·
die megde wurfen ǒch den bal·
si begvnden strîchen·
dar nach hv̊b sich des meien ein vil michel tanz·
den sang in bele vor vnd manig ir gespil·
froͤiden vil
haten sie
in was dort wol got helfe vns hie·

Anmerkungen (Wikisource)

1. Vorlage: dar.