Owe liehten tage (Mit aufgelösten Abbreviaturen)

Owe liehten tage·
owe blv̊men rot·
owe vogelsank·
owe grvͤner walt·
nv wirt aber kalt·
nv der winter lank·
das ist der vogel not·
vnd ir meistv́ klage·
noh clage ich die schvlde·
dc dv́ seldebere·
enterbet mich ir hulde·
dc sint mine swere·
die ich von ir dvlde·
minne wende ir svͤssen has·

Minne frowe min·
tv̊ mir helfe kunt·
 hilfe an der zit·
bit dc reine wib·
dc ir kúscher lip·
gegen mir lâsse den strit·
vnd ir roter mvnt·
mir tv̊ helfe schin·
seht so wolde ich singen·
der vil reinen svͤssen·
dv́ kan swere ringen·
kan si da bi kvmber^{[WS 1]} buͤssen·
sol mir wol gelingen·
minne sich des bist dv wer·

Wip din svͤsser nam·
vnd din werdekeit·
git vil hohen mv̊t·
dem der tvgende hat·
der vntvgende lat·
wie wol das tv̊t·
der wirt tvgende bereit·
vnd dv́ rehtú scham·
reiner wibe^{[WS 2]} gvͤte·
kan wol froͤide leren·
si git hohgemvͤte·
da bi froͤide meren·
got mir si behvͤte·
die der ich wol gv̊tes gan·

Mich hat lieber wan·
in die froͤide braht·
dc ich wande sin·
von den armen gar·
nv wirt ich gewar·
an der vrowen min·
ir ist vngedaht·
lones si wil lan^{[WS 3]}·
mich in senden sorgen·
mir ist we zemv̊te·
iemer an dem morgen·
so sorge ich nach gv̊te·
ich mv̊s minne borgen·
vrowe min wie stet das dir·

Anmerkungen (Wikisource)

1. Vorlage: kvmb̾ber.
2. Vorlage: wibes.
3. Vorlage: lones ſi wil lan.