Seht an die heide (Mit aufgelösten Abbreviaturen)

Seht an die heide·
seht an den gruͤnen walt·
liehter ǒgenweide·
der hant si gewalt·
blv̊men lǒp dv́ beide·
mit manigem húbschen kleide·
so sint si bekleit·
dien tet vil leide·
der lange winter kalt·
balde hinnen scheide·
sin twingen manigvalt·
valwe loͤke reide·
tragent ivnge stolze meide·
des sint si gemeit·
var hin verwâssen·
vil gar verteilter sne·
dv mv̊st vns aber lâssen·
die blv̊men vnd den kle·
vf des meigen strâssen·
dien tete dv vil we·
da die vogel sâssen·
ir sang gegen sange mâssen·
die froͤwent sich als e·

Mich wil betwingen·
dc mich dvr lieb ie twang·
dc ich nv mv̊s ringen·
dar nach min herze ie rank·
ich wil aber singen·
der lieben vf gedingen·
min trost an ir lit·
la mir gelingen·
sit dc mir nie gelang·
minne an lieben dingen·
so wirt min truren krank·
si kan swere ringen·
die sorge vs herzen dringen·
mir were lones zit·
kvs von ir mvnde·
ich wene er sanfte tv̊t·
der ist zaller stvnde·
noch roter danne ein blv̊t·
eýa minne wnde·
dv machest vngemv̊t·
ob din trost mir gvnde·
das mir ein kvs die bvnde·
so dúhte si mich gv̊t·

Mich hat gebvnden·
der svͤssen minne bant·
minnekliches wnden·
nach dir min herze ie swant·
si hat niht erwnden·
sich habe min vnderwnden·
ir mvnt rosen rot·
minne vnd ir chvnden·
die sint mir wol erkant·
hette ich helfe fvnden·
so wer min dienst bewant·
nv hat si mich fvnden·
in trvren zallen stvnden·
da von lide ich not·
mich hat verseret·
ir liehter ǒgen schin·
wer hat geleret·
die lieben frowen min·
dc ir gvͤte meret·
mir lange wernden pin·
minne swer dich eret·
des mv̊t wirt gar verkeret·
nv bin ich doch din·

Owe der swere·
die ich von minnen han·
der ich sanfte enbere·
wand ein vil lieber wan·
der ist frioͤdebere·
da bi ist mir gevere·
dv́ minne vnd ir has·
si ist mir ze swere·
da von ich trvrig gan·
ob ich sinnig were·
des solt ich mich erlan·
minneclichv́ mere·
mir bernde froͤide bere·
nv troͤste mih bas·
lieblichv́ minne·
min sendes herze ist wnt·
sit dc ich brinne·
nach liebe zaller stvnt·
sorgen troͤsterinne·
dir ist min iamer kvnt·
troͤste mine sinne·
dc ich den kvs gewinne·
sprich ia roter mvnt·