Vort so wist van den wagenen ind van den perden, die sullen wir widder umb heym senden dat baltste dat wir moegen. Vort van Quecken, als umb tgheleide zů senden, hain wir eme bevolen, wanne id eme ziit důnckt siin, dat he eweich vare ind des gesenne, want dat geloissen nyet en douch. Vortme also als yr uns schriift, wie dat yr gerne wissen sult, wie id uns ginge, so wist dat wir Gode danke alle gesont ind birve mit lyve ind mit goide vur dat huys zu Riifferscheit komen sint ind lygen alreneyst deme hertzogen van Guylche ind hoffen, dat wir wail ligen, mer wir sint noch unledige lude mit logieren. Vort so haint die viant van den huyse einen soldener van Coellen gevangen mit namen Luytghiin ind dar zu einen anderen wailgeborenen kneicht, ouch haint sii eynen jongen Coelschen kneicht doit geslagen.
Lieve herren ind vrunde, yr sult wissen dat Mathiis Kassart leider doit is ind in soittersdage zů åvent onnutzlich umt huys lief, blois, buyssen ymans wisse ind sonder gewer, also dal he geschossen wart beneven aen sinen sloiffe, also dat he siich bigette ind siin testament deide, ind des morgen op den sondach mysse hoirtte ind dat heillige sacrament untfienck ind zů seys uren nae middage starff in goiden kennis, also dat he zer Sleiden begraven is, als heis begert hait, dat uns allen truwelichen leit is, dat he als onnutzlichen bleven is. Vort so wist, dat der hertzoge van Gelre zer Sleiden geweist is, ind hedde gerne umb eyne soene gededinckt, also dat he hye geloissen hait siinre vrunde eyns deils, die mit den van Blankenheim ind van Gerartzsteine alle diesen dach mit den Gesworenen umb eyne soene gededinckt haven, die doch sere onnůtzlich bieden; doch so dunckt uns, dat die herren gerne van stat weren, ind wir die nyet en vinden, als wir lest dar van schieden, doy die gesworenen bii eyn woren, ind als die reces inne halden, ind die herren nyet hie in sint mit yren
Josef Laurent: Aachener Stadtrechnungen aus dem XIV. Jahrhundert. Aachen 1866, Seite 90. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Aachener_Stadtrechnungen_aus_dem_XIV._Jahrhundert.djvu/96&oldid=- (Version vom 31.7.2018)
