complementum vnd abgang vom quadranten ist der winckel CEB. 54°. Item deß stumpffen winckels AEC. 144°. complementum vnd abgang vom halben circkel / ist der winckel CED. 36°.
8. Chorda ein saiten / ein sennen / ist ein gerade lini / so in einem Circkelrunden riß mit beyden orten anrüret / vnd den gantzen circkel in zwey segmenta oder stuck theilet / welche sie beyde subtendirt. Daher sie sonsten subtensa, das ist / ein vnderzogene lini: Item inscripta, ein lini in den circkel gerissen / genennet wirdt. Die gröste chorda eines jeden Circkels ist sein diameter, mittelriß / oder durchzug durch das centrum oder mittel punct lauffent / so den Circkel in zwey gleiche segmenta, nemblich in zwen semicirculos theilet.
Als in dieser Figur ist / GC. oder FH. Durch die andern chordas aber alle wird der Circkel in zwey vngleiche segmenta getheilet / deren eins grösser / das ander kleiner ist / als ein semicirculus. Als die chorda IB. subtendirt auff der einen seiten den kleinern arcum IFB. auff der andern den grössern IHB.
9. Sinus, ist ein gewisser theil von der chorda, dessen seind etliche arten / welchen diese beschreibung allen gemein ist. Als /
Matthias Bernegger: Manuale Mathematicum. Straßburg: Paul Ledertz, 1619, Seite 18. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Bernegger_Manuale_018.jpg&oldid=- (Version vom 31.7.2018)
