auch herr Conrat Römischar künig / des bemelten keyser Fridrichs sun vnd etlich fürsten vn[d] herren mit im auf der tonaw gen Wien / vnd beliben drey monat da selbs / Also ward hertzog Fridrich von dem kayser vnd seinen aygen leüten vertriebn piß in das vierd iar / das er nichts hett / dan medlinger burg / die Newstat vnd dz gsloß Starchenberg / vn[d] kayser fridrich machet aus wien ain reichstat / vnd gab in für ir wappen ain guldin adler mit ainem haubt in aine[m] schuartzen feld / das selbig wappen die stat Wien auf den heütigen tag füeret vnd da vierdhalb iar vergangen waren / da belegert hertzog Fridrich die statt wien mit hilf herren Wentzlabs künigs zuo Behem / vn[d] auch mit hilff aines grafen von pogn aus pairen / vn[d] ließ in nicht zuo gan vo[n] speis vn[d] getranck / das vil volck in d[er] stat hunger sturbe[n] / vn[d] als ma[n] geschriben vindt muosten etlich menschen in der stat wien hund essen Es galt auch ain mut traid[1] vij t[?][2] oder pfund [Pfennig]. der sweren müntz / der wein wz auch teür j aimer vmb xij [Schilling] der sweren müntz / Zu lest ergaben sich die wiennr vn[d] das gantz land österreich / vnnd namen hertzog Fridrichen widerumb auf zuo irem herren vn[d] landsfürsten / desgeleichenn teten die steirer vn[d] krainer / Also machet hertzog Fridrich aus wien widerumb ain fürstenstat / dar nach ward hertzog fridrich mit dem kayser verricht / vn[d] der kayser berüft in zuo im gen dietrichs pern[3] / da hin rait der fürst mit .cc. pferden all in scharlach geclaidet vnd weiß strich mitten da durch / den empfienng der kayser gar freüntlichen vn[d] beweiset im große eer / vnd schanckt im xij maultier die waren seltzam herauß im land vn[d] xij haiden die ir pflagen / vn[d] als hertzog fridrich von Pairen rait vn[d] kam auf die stainen prugck die über dz wasser genant die Etzsch da selbs get / da sluogen sich die walhen mit seine[m] volck auff der prugk / vn[d] der walhen warden ertrengt vn[d] erslagen ob hunderten / vn[d] dem herzogen nit me wan ain diener / vnd der krieg zwischenn dem hertzogen vnd den pernern ward durch herren Otzlein des kaysers haubtman verricht / Also zoch hertzog fridrich mit freüden wideru[m]b gen österreich / vn[d] als hertzog fridrich die stat wien wideru[m]b in sein gewalt bracht beweist er den burgern gar vil guotzs vn[d] het sy vast lieb / vnd nam xij iunger burger sün an seine[n] hof / die füert er mit im gen Behem da er sein müemel fraw Gerdrauten von medling seines bruoder tochter herren Vladislaben marggrafen zuo merhern verheirat / da durch der krieg den künig Wentzlab von Behem des bemelten marggrafen vater mitt hertzog fridrichen het verricht ward / vnd als man zalt M.cc. vn[d] xliij iar / schied hertzog fridrich die egemelten frawen .N. ain hertzogin von meran sein andere gemahel auch von im in gegenwürd herren Eberhards ertzpischoff zuo Saltzburg herren Rüdigers bischof zuo Passaw vn[d] in gege[n]nwürd vil ander persone[n] gelerter vn[d] vngelerter / vnd als man zalt M.cc. vn[d] xlvj iar / ward dem benanten hertzog fridrichen gegeben auf das hertzog hüttel / das kayserlich kreütz / vo[n] kayser Fridrichen de[m] andern / aber kayser fridrich der erst / hat hertzog Heinrichen den namen Jochsamergot geben / das geritzt kreützlin auf das hertzog hütlin / Vnd herr heinrich Römischer künig kayser fridrichs des andern sun / hat gegeben hertzog Lewpolden von österreich dem ernreichen die zwen kayserlichen pogen auf das hertzog hütlin / Also sindt die herren von österreich von den kaysern künigen vn[d] fürsten für ander hertzog begabet worden / mit vil anderen mercklichen freyhaiten in iren brieflichen vrkünden begriffen / hertzog Fridrich
Ladislaus Sunthaym: Der löblichen Fürsten und des Landes Österreich Altherkommen und Regierung. Basel (bei Michael Furter): –, 1491, Seite 30. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Sunthaym_Der_l%C3%B6blichen_1491_30.jpg&oldid=- (Version vom 1.8.2018)
