Ein Stättlein in Meissen / vnd dem Leipzigischen Craisse 4. kleine Meyl von Hall in Sachsen / vnd 4. grosse Meyl von Wittenberg / vnd zwischen selbigen Stätten / so vor diesem denen von Anhalt gehört hat; aber Anno 1276. vom Landgraff Friederichen zu Thüringen/ Marggraven in Meissen / ihnen genommen worden / weilen sie es / im Krieg mit Bischoff Erichen von Magdeburg / hielten / wie Calvisius in opere Chronologico, auß Fabricio, schreibet. Ist ein kleines Stättlein an der Mulda / in welche daselbst ein anders Wasser kompt/ vnnd an den Gräntzen deß Ertzstiffts Magdeburg gelegen. Hat einen Superintendenten.
Ein Fürstlich-Weymarisch Stättlein 4. Meylen von Erfurt gelegen; so vor Zeiten / Gleichisch gewesen. Hat ein Herrschafft / so an die Herrschafft Cranichfeldt / die auch in Thüringen gelegen / stosset. Anno 1449. in dem Brüderlichen Krieg / hielten es die Graven von Gleichen mit Churfürst Friederichen / deßwegen Hertzog Wilhelm Blanckenhain / wiewol vergebens / belagerte.
Ein Stättlein in Meissen / 3. Meylen von Altenburg / vnd 2. von Leipzig / oder wie es andere rechnen / von jedem Ort dritthalb Meylen / (theils setzen gar 3. Meylen von Leipzig /) vnnd fast in mitten derselben Stätte / beym Wasser Pleyß / an einem lustigen vnd fruchtbaren Orth / da das Land Saffran herumb wächst / gelegen. D. Erasmus Stuler sagt in seinem Commentario von dem Lande zu Meissen / also: Keyser Heinrich der Erste hat der Sorben Wenden Hauptstatt Gietana / (welche heutiges Tags Geythen ist) zu ewiger Gedächtnuß seines Sieges wider auffzubawen verbotten: die Barinos, so hin vnd wider zerstrewet auff den Dörffern wohnen / hat er zusammen getrieben / vnnd ihnen eine Statt gebawet / von welchen sie noch den Nahmen behelt; wiewol derselbe Nahme corrumpiret / vnd verändert / daß man Borna / für Barino, saget. Siehe vnten Geuthen. Es ist Born in den Kriegen / sonderlich der Keyser Adolphi vnd Alberti, vnd Marggraff Friederichs zu Meissen / wol bekandt / vnd von Graff Philipsen zu Nassaw damaln eingenommen worden: vnd haben solches Stättlein Anno 1449. in dem innerlich- oder Brüderlichen Krieg / deß Hertzog Wilhelms zu Sachsen Helffer / die Böhmen / außgebrandt. Was allda in dem jetzigen Krieg vorgangen / wird etwa noch künfftig mit mehrern Vmbständen herauß kommen: hat eine Superintendentz.
Ein Stättlein im Chur-Creysse / an der Elb / nahend Bretsch / vnd Dömitsch.
Es liegt bey Brettin / das Schloß Liechtenberg / auff welchem Churfürsts Christiani II. zu Sachsen Fraw Wittib /
Matthäus Merian: Topographia Superioris Saxoniae. Frankfurt am Mayn: Eigenverlag, 1650, Seite 64. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Superioris_Saxoniae_(Merian)_064.jpg&oldid=- (Version vom 1.8.2018)
_064.jpg&oldid=-){kind=link}
_064.jpg&oldid=3393407){kind=link}