Krieg abgebrandt worden seyn muß. Anno 1349. wurden allda: Item / zu Herbersleben / vnnd Denstet / die Juden verbrant / vnd todt geschlagen. Anno 1474. thaten die Mordbrenner allhie / wie auch zu Artern / vnd Stafelstein / grossen Schaden: wie in einer der besagten Chronick stehet.
Damit/ hat es gleiche Meynung / als mit dem nächst gesetzten Nebra / vnd wird solcher Orth / in der angezognen Clagschrifft / auch vnder die abgebrandte Stätt gesetzt. Es liegt aber dieses Neustat in Thüringen; vnnd wird berichtet / das es ein feine Statt vor dem nächsten Krieg / vnd Chur-Sachsen zuständig / gewesen / allda / zwo Kirchen / auch Vor-Stätte / vnd viel Tuchknappen waren. Lige bey dem Wasser Orla / vnnd an einem Wald / die Heyde genant / ein Meylwegs vom Stättlein Peßneck. Dresserus in seinem Stättbuch / am 466. Blat / schreibet / daß das Closter der Eremitaner allhie zur Neustat Anno 1292. solle gestifftet worden seyn. Die Mönch haben Anno 1522. die Bilder verbrant / ihrer eins theils auch Weiber genommen. Nicht lang hernach ward solches von den Burgern geplündert / vnnd alles / was man gefunden / außgetragen. Die Pfarrkirch / zum Newenhof genant / seye vor der Statt: In der Statt aber ein andere Kirch / darinn die wahre Religion / vnnd Gottesdienst / verrichtet werde. Es solle Neustat / mit der Graffschafft Orlamund / vnd andern Orthen / Anno Christi 1301. an Marggraff Friderichen in Meissen / mit seiner Gemahlin Elisabeth / Grävin von Arnshaug / kommen seyn; welches Schloß Arnshaug bey Neustatt gelegen ist. Vnd wird solches Arnshaug noch eine Graffschafft genant / vnnd in den Voigtländischen Craisse / weil solche vber der Sala / gegen dem Voigtland gelegen / gezogen. Anno 1632. ward Neustat / den 13. Octobris / von den Crabaten gantz außgeplündert. Wann aber solche Statt abgebrant worden / haben wir noch zur Zeit nicht gefunden. Hat ein Chur-Sächsische Superintendentz.
Ein Marcktflecken im Voigtlandt / zwischen Plawen vnd Zwickaw / von jedem Orth zwo Meyl gelegen / so An. 1632. Herrn Moritz Haubolden von Schönberg gehört hat.
Es ist auch ein Neumarckt in Thüringen / an dem Wässerlein Vippach / nahend dem Schwansee gelegen / daherumb Anno 1332. die Erfurter dem Landgraven mit brennen vnd verderben Schaden thaten: wie in der geschriebenen Thüringischen Chronic stehet. Bange aber / in seiner getruckten Thüringischen Chronic / sagt p. 131. b. also: Anno 1335. verderbten die Erfurter Neuenmarck / Buttelstedte / Thomasbrücken / vnd was vmb Gotha gelegen.
Ein Stättlein / vnder dem Ampt Belzig / vnd nicht weit von selbiger Statt / an dem Wasser Ada / vnnd in Chur-Sachsen / oder im Chur-Creyß gelegen; So aber der Zeit abgebrandt seyn soll.
Matthäus Merian: Topographia Superioris Saxoniae. Frankfurt am Mayn: Eigenverlag, 1650, Seite 266. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Superioris_Saxoniae_(Merian)_266.jpg&oldid=- (Version vom 1.8.2018)
_266.jpg&oldid=-){kind=link}
_266.jpg&oldid=3393538){kind=link}