|
Christian I. (Dänemark, Norwegen und Schweden): Item privilegium der lande Sleswigk Holsten unde Stormarenn |
|
|
1460. März 5. Ripen. 18.
Wy Cristiern van godes gnaden to Dennemarken Sweden Norwegen der Wenden unde Gotten koningh greve to Oldenborch unde Delmenhorst bekennen unde betugen openbare mid desseme jegenwardigen unseme breve vor alle den jennen dede ene sehn horen offte lesen, dat de erwerdigen prelaten strengen ridderschop ersamen stede unde inwohnere des hertogdomes to Sleswik der lande unde greveschop Holtsten unde Stormeren uns hebben gekoren to eneme hertogen to Sleswigk greven to Holsten unde to Stormeren; vorben. hebben ok uns annamet unde huldiget vor eren heren nicht alse eneme koninge to Dennemarken men alse ereme heren desser vorgeschreven lande mid underschede aller article unde stucke hir na utgedrucket.
To deme ersten umme bestentlicheid dersulven lande an [vre]de to holdende willen wy unde scholen den cristenen loven gudesdenst unde den rechtverdicheid holden holden laten beschermen une nicht krenken men meren na unseme vormoge, enen isliken inwoner der erben. lande gestlik unde werlik ridderschop stede alse Sleswik Flensborch Hedersleve Hamborch Kiil Ytzeho Rendesborch unde alle andere stede clene unde grot der vorg. lande ere inwoner den kopman unde wanderenden minshen bi ereme rechte unde vriiheid to latende unde se dar ane beschermen, unde alle ere privilegia vriheid recht unde alle erlike sede unde wonheit over alle desse vorg. lande willen unde scholen de besegelen vorbreven unde besteden samptliken unde eneme isliken besundergen de dat eschet. De wy ok alle in crafft desses breves nu vulborden tolaten unde besteden ewich to blivende. Ok arge sede de jegen god unde recht sind afftokerende naunseme votmogen. De Lubeschen scholen bruken aller vriiheid de se unde ere kopmann mid rechte andessen landen had hebben bi tiden unses seligen ohmes hertogen Alffves; hebben se ok privilegia der en unse vorg. ohme pflichtic was to holdende, de love wy en ok to holdende. Vurder bekenne wy unde stan to, na deme dat wy mit sampt unsen leven broderen heren Mauriciusze unde Gerde greven to Oldenborch unde Delmenhorst van bord wegene de negeste erve na dode unses seligen ohmes herren Alffves vorg. to densulven landen sin, dat wy to densulfen gerkoren
Christian I. (Dänemark, Norwegen und Schweden): Item privilegium der lande Sleswigk Holsten unde Stormarenn. Ripen 1460, Seite 28. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Vertrag_von_Ripen_01.tif&oldid=- (Version vom 12.6.2020)
