Seligú ſum̾ zit
[310r]
Seligú ſum̾ zit·
dú biſt gar v̾dꝛungē
rife [310v] in den ǒwē lit·
da die vogel ſungē·
ſit dú froͤide iſt gar da hin·
ſo wil ich gedēkē dar der ich eigenliche bin·
Froͤlich̾ ſvnnē tag·
roſe ī ſuͤſſē tǒwe
ich dich wol gelichē mag·
Schoͤne vn̄ hohē mv̊t·
hat min frowe vn̄ ere·
da bi ſo iſt ſi gůt·
noh hat ſi uil m̾e·
wol beſcheidē tugēdē vol·
dar zů lit an ir der wunſch dc tůt minē h̾zen wol·
Froͤlich̾ ſvnnē tag·
roſe ī ſuͤſſē tǒwe
ich dich wol gelichē mag·[WS 1]
Dv ſolt min meie ſin·
vn̄ min ſpilndú wūne·
vn̄ ich der diener din·
klar alſā dú ſv̄ne·
iſt din liehtes ǒgen bꝛehē·
da mvͤſſe ich ī kurzer zit mich noh froͤlich īne erſehē·
Froͤlich̾ ſvnnē tag·
roſe ī ſuͤſſē tǒwe
ich dich wol gelichē mag·[WS 2]
Eſ iſt vngelúkes ſin·
vn̄ an der ſchilt wahte·
bi dir min troͤſt̾in·
vil der kaltē nahte·
lidē wir vf dirre vart·
die d̾ kúnig gen miſen vert· we dc ſi ie ſo ſpetú wart·
Froͤlich̾ ſvnnē tag·
roſe ī ſuͤſſē tǒwe
ich dich wol gelichē mag·[WS 3]
Ich wolte g̾ne ſin·
vúr daſ vngemvͤte·
bi dir mī troͤſt̾in·
ia fúrhte ich dc wuͤte·
an vns rife vn̄ ǒch der ſne·
můſ ich dar zv̊ trinkē bier lieb ſo froͤideſt dc mich me·
Froͤlich̾ ſvnnē tag·
roſe ī ſuͤſſē tǒwe
ich dich wol gelichē mag·[WS 4]